Corvara: desgrazia sön pista

Data

03 de fauré 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La pista de Boà a Corvara é stada incö danmisdé scenar de n bur’ inzidënt, baldi cun n mort
N gröm de jënt rabësc de por de sön nostes pistes y baldi vëgnel a s’l dé val’ iade de burtes desgrazies. Insciö ince chësc lönesc ai 3 de forá incër les 11 danmisdé, olache al é sozedü na desgrazia sön la pista dl Boà a Corvara, che ti á costé la vita a n ël dala Ruscia. L’ël gnô jö por chëra che vëgn tlamada "La direta" - sciöche l’inom lascia bele pensé na pista plülere ërta. "Al é gnü completamënter roduntajö, jödapé él jü fora de pista y é spo salté te n lëgn", dij Raimund Irsara de Badia, che é responsabl dles pistes por le raiun de Col Alt y Boà. Chësc é altamo ci che al pó dí sön testemonianza de dui ghesć dl’Austria che á odü la scena. Le corp é gnü ciafé apresciapüch 30 metri fora de pista – nes dijel inant – y al é sté la fomena dl ël che á cherdé i socursc. Insciö él rové alerch le socurs dles pistes, le joler Pelikan 1 y ince i Carabiniers. "Dui doturs spagnoli che ê iló â intratan porvé da le reanimé, mo al n’é plü sté nia da nen fá", dij Irsara. Al sará le compit dles forzes dl ordin da inrësce do avisa les dinamiches dl inzidënt, insciö ince sce al jô de süa buna massa debota o sce al á bele denant pordü le control. Che l’ël pálses tla pésc.  (pablo)