La Usc di Ladins

La jöbia ai 6 de forá êl pordërt na gran proa d’evacuaziun dl lift de Piz La Ila, cun ala pert düc i grups di stödafüch dl’Alta Badia sciöche ince scuadres dl Aiüt Alpin. Rodunt tratan la proa, incër la mesa dales 7, gnôl indere na cherdada por i Stödafüch da San Ciascian, por via de n inzidënt che ess podü avëi de burtes conseguënzes. Sozedüda ésera a San Ciascian, defata defora dal Para Varda, olache n ël é rové cun l’auto massa infora da strada y é spo coreté sura tlander, arsin sön tët y sbriscian ciamó inant. La dinamica y le scenar lasciâ ponsé al piec, mo por fortüna é les döes porsones t’auto stades bunes da gní fora sores y ne s’á nia fat de maiú; chësc sambëgn zënza desmentié la gran spordüda. Impó é les döes porsones gnüdes condütes dala Crusc Blancia Alta Badia te ospedal por azertamënc. Söl post él rové dlungia i Stödafüch da San Ciascian y la Crusc Blancia ince i Carabiniers che á fat les inrescides de dovëi sön le sozedü.  (pablo)