La Usc di Ladins

Incö él Capiun y al á metü man por i cristians le tëmp sant dla Carsëma, le tëmp de preparaziun ala festa plü grana dl ann: la Pasca de Ressoreziun. Por la Ploania d’Al Plan, por la Val Badia y por döta nosta Diozeja ára iniann n tonn particolar, deache ara sará ince de preparaziun por n avenimënt che vëgn a s’l dé tres plü dainré: na mëssa noela. En Lönesc de Pasca ai 13 d’aurí dales 3 domisdé sarál tl dom da Porsenú la ordinaziun de siur Stefano Trevisan, jonn d’Al Plan che á tut la dezijiun da jí a lauré sciöche prou tla vigna dl Signur. La mëssa noela gnará spo a s’l dé la Domënia Blancia ai 19 d’aurí, te chë dlijia olache Stefano é gnü batié, á ciafé la Pröma Comuniun y é gnü crejimé.
L’ultima mëssa noela che Al Plan á odü é chëra de siur Hans Maneschg da Cianëi l’ann 1968, dan passa 50 agn. L’ultima mëssa noela tla Val Badia é stada chëra de siur Klaus Sottsas dl 2008 a Rina. Siur Klaus é incö ploan d’Al Plan y á porchël instës le plajëi da tó sö te süa Ploania n primiziant. Stefano Trevisan ê pormó l’ann passé de messé gnü ordiné diacon.

I se l’un cuntada cun Stefano Trevisan (söla foto bel a man ciampa), por damané co che al se sint püces edemes dan le gran de. Lapró unse ince baié cun le presidënt de Ploania d’Al Plan Carlo Suani, por damané co che an s’arjigna ca a chësc gran avenimënt. Deplü podëise lí t’La Usc di Ladins di 28 de forá.  (pablo)