La Usc di Ladins

Intervënt por i Destüdafüch da Corvara en vëndres ai 28 de forá incër mesa dales 10. N camion ê rové adalerch por ciarié pellets pro le Residence Belavista. Da informaziuns che i un ciafé dal comandant di Destüdafüch Helmut Thaler, é le meso sciöche al pé pié ia su tratan le refornimënt, y é rové deplëgn te n tiac. Iló él jü cun la roda dant sura n mür jö. Deache al é dificoltés da rové pormez cun le tanch, é i stödafüch jüs sö cun de mëndri auti y á spo ciafé aiüt dai lauranc de Comun cun la gomada. I stödafüch á albü da assiguré le post dlintervënt y ancoré le tët dl tiac, che ê daldöt sura cabina dl meso. Canche döt é sté assiguré, á le camion podü gní trat sö zoruch. Feris n’él por fortüna sté degügn. Dann án albü pro le tiac che é desfat, sciöche ince zacotan de danns materiai pro le gran meso.

Dann material a La Ila
N inzidënt él danmisdé ince sozedü a La Ila, al’altëza dl Durni’s. Sön la strada provinziala él salté adöm dassënn n auto y n camper, por fortüna ince chiló zënza feris, mo cun gran dann material a intrami i mesi. I Stüdafüch da La Ila é gnüs cherdá dales 9:40. Sciöche le comandant Armin Bernardi nes á dit, ái albü da assiguré jö le post dl intervënt, daidé i polizisć de Comun da regolé le trafich y dedó ince daidé desgorje intrami i mesi.  (pablo)