La Usc di Ladins

Ince te nüsc paisc turistics coltivëion bele da agn partenariac cun de gran imprejes de inom y pom, che fej retlam te nostes localités y mët porchël a desposiziun scioldi. Nia dagnora ne vá la filosofia dles imprejes bel a öna cun le spirit dles localités. N ejëmpl de sciöche ara ne dess do mia minunga nia deventé, ái odü a Kitzbühel en gaujiun dles gares de Copa dl Monn: pista y localité placatada cun retlam de na gran marca de auti, mo ci che m’á ciamó plü spordü: na plaza dl paisc denominada aladó de na famoja firma de chertes de credit. Chësc ne pó nia ester ci che an ó arjunje. De chësta minunga éson ince tla Cooperativa Turistica d’Al Plan y San Martin, olache an á te chisc ultims agn descurí tres deplü na cosciënza y na responsabilité ince por la chestiun ambientala y dla sostenibilité. Chësta filosofia dess sëgn ince se respidlé tl partenariat internazional che an á firmé da püch cun la firma Swarowski Optik, che mët dancá te süa filosofia imprenditoriala la chestiun ambientala y de sostenibilité.
Le diretur adora tonns nüs de chësc vers y dij che an á orü chirí n partner cun chël che an pó partí i medemi valurs dla sostenibilité: ambientala, soziala y economica. Al arata che i partenariac cun imprejes de auti n’ais nia da fá cun nostes localités y dij ince che le dër prestisc é chël de podëi dí de no. Chësc partenariat pormó firmé aratel n vare dl dër vers mo ince n model che podess fá scora.

Deplü podëise lí t’La Usc di Ladins di 6 de merz, olache i ves dijun ince ci iniziatives che é preodüdes tres chësc partenariat nü.  (pablo)