I todësc dij che Südtirol é "raiun de prigo"

Data

06 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le Robert - Koch - Institut dla Germania á metü Südtirol tla lista di raiuns de prigo dal "coronavirus". L’assessur provinzial Achammer: "Dezijiun tomperia, nia da capí".
Sciöche sce ara ne tlecass nia cun les mosöres de prevenziun che i un tla Talia. Sëgn él ince le Robert-Koch-Institut (RKI) dla Germania che se mët. Te süa lista di raiuns de prigo dal "coronavirus", ál ai 5 de merz injunté lapró ince Südtirol, dezijiun confermada ai 6 de merz dales 11:20. Inscioma, sce ara vá do la minunga dl istitut todësch, é Südtirol sëgn tan prigorus sciöche Wuhan tla Cina, Teheran tl Iran o la Provinzia de Gyeongsangbuk-do tla Corea dl Süd. Sciöche raiuns de prigo tla Talia vëgnel ince metü tla lista les regiuns dla Emilia Romagna, Lombardia y Vo’ tla provinzia de Padova.

Achammer: "Dezijiun nia da capí"
La dezijiun dl RKI é tomada bonamënter do che plü porsones dla Germania ê resultades infetades dal virus do ester stades tl Südtirol, ince sce al n’é nia gnü confermé che ares s’á veramënter taché la coia chiló. Pücia comprenjiun desmostra l’assessur provinzial Philipp Achammer, che scrí insciö sön Facebook: "Por me n’é chësta dezijiun bunoria nia da capí. (...) Al n’é degünes proes che i ghesć todësc s’ais taché la coia chiló".

I todësc na gran sona de turisć
Chësta dezijiun podess avëi bindebó de conseguënzes, suradöt por chi raiuns che laora tröp cun todësc. I pënsi chiló al raiun da Maran o a döt l’Unterland, olache la sajun piará ia chëstes edemes. Ince chiló da nos é i todësc n marcé important. Tla Val Badia él te vigni comun le secundo marcé do chël talian. Y al n’é nia na piec coia co la tëma, che pó ince porté a comportamënc demorvëia. N ejëmpl fej le diretur dla Cooperativa Turistica d’Al Plan/San Martin Carlo Runggaldier sön Facebook, canche al scrí: "Delire di ghesć todësc: ’i messun desdí la vacanza deache le raiun danter Al Plan y le parch natural Fanes-Senes-Braies é raiun cöce’" Rodunt i parcs naturai, che podess forsc ester propi te chisc tëmps danter i posć plü nëc y sigüsc che al é.  (pablo)