La Usc di Ladins

"Cun i pröms de jügn vëgnel daurí le Bagn Cortina a Al Plan de Mareo. L’abondanza de chësta fontana, sciöche ince les condiziuns climatiches mët chësta localité da bagn tla pröma linia danter i bagns de Puster." Chëstes parores ciafon tl foliet "Pusterthaler Bote" di 13 de ma 1870. Al é ma öna na desmostraziun che le Bagn Cortina d’Al Plan ê bele dandaía n post chirí dala jënt por medié de vigni sort de malérs. Sëgn, feter 150 agn dedó, é la faziun de chësta ega metüda fosch sön blanch, deache le Ministér dla Sanité talian á ofizialmënter reconesciü l’Ega dal Bagn sciöche ega termala.
Cina ciamó êl te Südtirol ma trëi termes: les termes da Maran, le bagn "Brennerbad" y le bagn "Kochenmoos" a Naturns. Sëgn n’él gnü trëi lapró: le bagn "Moos" tl Sest, le bagn "Salomonsbrunn" ite en Antholz y le bagn Cortina d’Al Plan. Incö án te Südtirol na sort de renascimënt di bagns minerai. Na sbürla por ti dé plü valüta ai bagns d’Al Plan é gnüda dai patruns dl Hotel Aqua Bad Cortina, manajé da Nicol Alberti y süa familia. La zertificaziun a ega termala deura ince por l’ostí poscibilités nöies de spezialisaziun.

 (pablo)