La Usc di Ladins

"La situaziun dl coronavirus se müda da de a de", comentëia le dotur de ciasa Eduard Agreiter la situaziun momentana (13 de merz, adr) cun le "coronavirus", y al fej ciamó n iade n apel da nia bagatelisé la cossa. "La cossa é da tó söl scerio y al foss dërt che düc surantoless la responsabilité. Les regoles de comportamënt conesciunse oramai – se lavé gonot les mans, mantigní les destanzes, evité ragrupamënc – porchël inviëii dassënn da les tigní ite. Chi che ne se tin nia é iresponsabli. Sce düc se tin, vá le virus bonamënter zoruch, ince sce chël odarán pormó te n pér d’edemes."

Le Trentin comunichëia i caji - comun por comun
Te Südtirol éson rová en jöbia a 103 caji de porsones infetades y an á sëgn ince les prömes porsones mortes. De porsones infetades áldon tres deplü ince te nüsc paisc, ince sce an vëiga na desvalianza de politica danter Trentin y Südtirol: tla Provinzia de Trënt publichëia l’Aziënda Sanitara sön so sít internet na cherta cun düc i caji zertificá, comun por comun. Te Südtirol dijon les zifres complessives, porchël vëgnel dit che al é plü caji te Gherdëna y te Puster, ince sce le dotur Agreiter dij che sëgn él oramai indlunch da mëte averda.

"Porchël che an alda che un á borjú, n’ól nia dí che al á le virus"
Comuniché les zifres generales pó de un n vers ester stromënt de sconanza por les porsones atocades, dl ater vers ti deurel les portes ala spicolaziun. Sce an ne sá nia avisa, vëgnel gonot baié, slafé y nia dainré metü pormez ci che ne stimenëia nia. Chësc confermëia ince le dotur Agreiter: "I sá de caji cun porsones che á scemplamënter borjú y na strüscia, mo al vëgn cunté incërch che ai á le coronavirus. Porchël che an alda che un á borjú, n’ó nia dí che al á le virus."
N caje che á fat la roda é chël de na serada de musiga dan otedé tl comun da La Val, olache al le musizist ê positif y é rové te spitol. En chë sëra êl cotan de porsones a d’ascuté sö, porchël n’él sëgn ince en carantena. Le Comun da La Val á mené fora na comunicaziun, invian chi che ê stá ala festa da sté "rigorosamënter a ciasa por döes edemes y contaté le dotur de familia". 

Porsones stades a contat cun jënt infetada ne dess nia l’ascogne ia
Le dotur Agreiter inviëia en general la jënt: "Porsones che é stades a contat cun jënt infetada ne dess nia l’ascogne ia, mo le dí y se sconé. Che che s’amarëia vëigon ince pormó 14 dis dedó, ci che é sambëgn n problem. Lapró ne sán nia che che é asintomatics o tanc che le dá efetivamënter inant."
Le test dl coronavirus vëgn ma fat pro porsones sintomatiches. Chi che á sintoms – borjú sura 37,5°C, tos acuta, dificoltés da trá le fle – dess se lascé adintëne por telefon pro le dotur de ciasa, che mëna inant les informaziuns. Al é spo spezialisć che tol la dezijiun sce al vëgn fat le tampon o manco.
Co che la situaziun se svilupará gnarunse lassura chisc dis. La parora d’ordinn é veramënter: responsabilité – por se instësc y por i atri.

Les desposiziuns dla Provinzia y dla Unité Sanitara
1) Lavete gonot les mans
2) Mantin almanco n meter de destanza da d’atri
3) Evitëia da abracé zacai o ti toché la man
4) Stopete nes y bocia canche te mëss stranüdlé o tossí
5) No te brancé cun la man sön edli, nes o bocia.
6) Fá telelaur o tolete lëde
7) Vá te ospedal ma sce al mëss ester
8) Puzenëia les sperses indortöra cun dejinfetanc a basa de alcol o clor

Numer vërt: 800 751 751

 (pablo)