Chëstes edemes zënza scora y scolina, olache an dess lapró sté poscibilmënter te ciasa, rapresentëia por i geniturs na desfida nöia, olache ai mëss se studié manires por implí le tëmp, poscibilmënter ince te na manira creativa. N sostëgn ciafon sëgn da na plata internet nöia "Iö resti a ciasa, mo i me stüfi nia". Ara é gnüda cheriada da Evelyn Pitscheider da San Ciascian, uma de na möta de 5 agn y n möt de 3 agn. "I mituns oress gonot sté dan la televijiun, porchël m’âi ponsé da arjigné ca vigni de val’ da fá o da pastelné", dij Evelyn, che é na maestra dla elementara.
Do avëi abiné adöm de beles propostes, s’ára ponsé: ciodi pa nia les mëte a desposiziun ince de d’atres mames? Insciö éra jüda
te internet a ciaré olache ara ess podü s’arjigné debann n sit internet, che é defata sté en pe, y insciö ára metü man. Le suzes é atira sté da odëi, sciöche Evelyn dij: "Iö ti l’â ma mené inant a mi contac sön whatsapp, invian da jí a ti ciaré y da le mené inant, sce al ti plajô." Grana é stada süa morvëia, canche ara á odü che do püc dis ê bele jüdes ite passa 750 porsones. "Sciöche sce döt le paisc da San Ciascian foss jü a ti ciaré", dij Evelyn cun sodesfaziun. Lassura ciafon de vigni sort de propostes da pastlené, mo ince da cujiné. Evelyn spliga: "I á tut ca propostes che i á instëssa a ciasa, o che i sun jüda t’internet a me chirí adöm patüc. Deache an ne pó nia jí tles botëghes a cumpré material, ái ciaré da tó ca propostes olache an pó lauré cun patüc che an á bele te ciasa, sciöche bossi, brodi de papier de cagadú, cartuns dai üs, etc. Implü ái ciaré che al foss cosses che vá n pü’ plü debota por i mituns y che ti plejes ince ales mitans."
Nia inultima á Evelyn Pitscheider ince metü sö valgünes rezëtes: "Al é de te pices rezëtes che i á porvé fora instëssa y che m’é garatades", dijera. Insciö ne restel nia ater co jí a porvé fora, por passé insciö val’ bi momënc creatifs cun i mituns. Le sit é
https://io-resti-a-ciasa-mo-i-me-stufi-nia.webnode.it/ (pablo)
