André Comploi é rové a "La Scala"

Data

20 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ma püc dis denant che la Talia gniss sarada jö, s’á André Comploi d’Al Plan trasferí dala »Wiener Staatsoper« al Teatro alla Scala de Milan, olache al é sëgn coordinadú artistich. »Avisa adaldërt por les sentades de crisa«, sciöche al dij te na intervista
Bele l’ann passé êl gnü fora la noela che le capostampa dla Wiener Staatsoper André Comploi d’Al Plan ê gnü nominé coordinadú artistich dl Teatro alla Scala de Milan. La müda de post de laur é gnüda a s’l dé rodunt ai pröms de merz, püch denant che l’emergënza "coronavirus" atocass la Talia cun döta süa forza, architan ia deplëgn la vita economica, culturala, soziala. André é porchël a Milan te un di momënc plü zíti. Nos un orü ti fá na intervista a André, por damané co che an vir y laora te na cité che é sëgn "deserta", co che le coronavirus tira sotissura la sajun de "La Scala", ci che l’á sburlé da baraté post y ci che al s’aoda por le monn te chësc tëmp de trica.

La Usc: André, ai 20 de forá êste ciamó a Viena pal Opernball, gnanca döes edemes dedó este rové a Milan por mëte man to laur nü desco coordinadú artistich dl Teatro alla Scala, tl bel mez dla crisa dl »coronavirus«. Co é pa sté chësc trasferimënt, te n tëmp tan dramatich?
André Comploi: Sc’i pënsi zoruch é döt jü dër snel. Le »Opernball« é dagnora n piz tl ann de laur dla Staatsoper, n evënt por chël che nosc ofize laora mëisc alalungia, deache i arvenun gran pert dl bal ince por ci che reverda le contignü adöm cun l’organisadëssa. Do chësc tëmp sfadius sunse düc bindebó stanc y esson debojëgn de palsa – chësc ann personalmënter ciamó deplü deache paralelamënter me dôi bele jö cun La Scala. Deache le laur nü a Milan metô spo ince atira man, ái mefo apëna albü dui, trëi dis por stlü jö döt t’ofize a Viena. I ess sambëgn ince podü me tó la vacanza ch’i â dessorora a Viena dala fin de jená inant – mo i n’orô nia lascé mies coleghes y mi colegs tl’aria. A vigni moda: la jöbia do le bal orôi spo jí a Milan, mo a gauja dla situaziun bele malsigüda ái sburlé ite n iade a Berlin por odëi na rapresentaziun y incunté y baié cun artisć. La domënia él spo bele gnü desdit la rapresentaziun tla Scala, püch denant che la regiun ais publiché le pröm decret. Y le mertesc ái spo dit: sëgn vái! Y i sun mefo avisa rové adaldërt por les sentades de crisa. Sambëgn na situaziun dramatica por le teater – ince sce te nosc ciamp vára por fortüna ma sön paladina de vita o de mort. Y sce an vëiga spo ci che na situaziun dramatica te n ospedal é, sciöche chisc dis tla Lombardia y nia ma, spo relativëion la definiziun de »drama« tl monn dl teater.

Poste pa nes cunté co che te sintes y vires personalmënter chisc dis l’atmosfera de Milan?
Te mi pröms dis a Milan ê les rapresentaziuns d’opera desdites, mo la vita ê impó ciamó normala. Pro laur ênse conzentrá y studiân cun impëgn ipoteses dla planificaziun nöia dl calënder d’aurí. Al ê bel tëmp, da doman jôi te »mi« café a gosté n café y na brioche y liô le foliet, da misdé spo cun i colegs te n restorant o na trattoria a marëna. Döt adöm na vita dër plajora – le virus parô ciamó scialdi dalunc. L’ultim fin dl’edema sunsi spo ciamó jü a spazier fora por cité, tl dom, ti parcs – spo gnôl bele presenté le proscim decret ch’an ne dess nia se sposté fora de comun. Na gran rissa m’á spo salpü le momënt che i restoranc, bars y les botëghes á messü stlü. Sambëgn na dezijiun che messâ ester – mo impó sintii na »fetra« sensaziun. Te n iade, tl rode de gnanca n’edema, ê Milan deserta. Döt stlüt. Degügn sön strada. Chi püc ch’an incuntâ â mascheroc y manëces. I mëssi dí: la lezitënza di milanesc m’á fat impresciun. Iö instës jô ma vigni de n pér de menüc a pe da mi pice apartamënt t’ofize tl teater y da sëra indó zoruch. Spo ái sambëgn messü jí a cumpré ite val’ por ch’i ais val’ da mangé a ciasa. Pordërt n’âi nia fat le cunt da cujiné por me chisc mëisc, cina che la familia gnará do d’isté. Insciö s’á te cört tëmp mudé l’ambiënt de vita dassënn: impröma tres cun jënt. Y sëgn te n iade su, destaché da d’atres porsones, deache la familia é demez y d’atri contac soziai é da evité. Ince pro le laur él düc i colegs che sciafia che fej »smartworking« y ne vá nia plü t’ofize.

Döta la intervista ciafëise t’La Usc di Ladins di 20 de merz (Intervista: Pablo Palfrader)

Tla fotografia: André Comploi y Dominique Meyer, respetivamënter coordinadú artistich y "sovrintendente" dl Teatro alla Scala. (Foto: Alexander Tuma)