"Al vëgn pa bëgn indó l’aisciöda"

Data

22 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le coronavirus á zënzater trat sotissura la vita de dlijia y an ne sá nia ciamó sce an podará festejé Pasca deboriada. Intant se dëidon fora cun le Radio dla Cöra.
Domënia ai 15 de merz: te dlijia de Badia él siur degan Iaco Willeit che dij mëssa dan les proches ötes. Mësses y funziuns te dlijia é proibides por via dl coronavirus, mo al dij mëssa por che la jënt pois l’aldí tl radio. Chësc é sozedü te tröpes ploanies dla Val Badia, y ince le Vësco Ivo Muser á zelebré süa pröma mëssa dassú, che é gnüda trasmetüda te internet. I media se desmostra dër d’öga, te na Carsëma che i n’un mai vit denant insciö. Siur degan dá pro che al é na situaziun che mët dan da desfides nöies: por intant mëssel gní sburlé düc i bati, dötes les nozes y gnanca les sopoltöres ne pón festejé sciöche al toca. Y an ne sá nia ciamó tan dî che ara jará inant. Dl ater vers dij siur degan che al é n tëmp che nes mët da ponsé sura y pó nes daidé descurí danü le valur dles cosses ch’i aratân logiches y al dij: "Al vëgn pa bëgn indó l’aisciöda".

La Usc: Siur Degan, na Carsëma zënza mësses y funziuns n’arëise gnanca Os ciamó mai viü...
Siur degan Iaco Willeit: No, chël no. Al é na situaziun propi completamënter nöia. Nos ân arjigné ca ince dla Dlijia infora programs por la Carsëma, por preparé la jënt ala Pasca y sëgn éra gnüda döt atramënter. Mo magari é chësta ciamó na miú Carsëma co les atres.

Chësc mëssi Ves perié da me splighé.
Zënza él dagnora döt che pé logich y che vá automaticamënter y an fej mefo do tradiziun. Sëgn sunse indere completamënter metüs dan a n cer’ öt, an á tëmp da ponsé sura, da fá reflesciun y se damané: co é pa nosta vita, olá junse pa, ci é pa important? Chëstes é domandes fondamentales, cun chëres che an se confrontëia magari massa püch tla vita tan movimentada d’aldedaincö.

Tla Carsëma inviëion dagnora da renunzié a valch. Sëgn sunse te n colp sforzá da renunzié, nia ma ala cern, mo cinamai ai contac, al jí alaleria, zacó ala liberté. Podëise pa impó davagné ince val’ de positif da chësta situaziun?
Impröma la sinton pa bëgn dër negativa, chël mësson dí. Gnanca plü podëi s’incunté, jí fora, se bëre le café o fá les cosses che an é ausá. Y gnanca plü podëi jí a mëssa. Dl ater vers unse davagné tëmp. Sëgn sunse te n iade ric de tëmp, por tan de cosses. I un tëmp por nos instësc, por la familia y ince por Chël Bel Dî. Chësc vel ince por me.

Döta la intervista ciafëise t’La Usc di Ladins  (Intervista: Pablo Palfrader)