Solidarité "ladina" a Modena: pizzes por le spitol

Data

25 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’emergënza descëda ince solidarité: l’aziun é gnüda inviada ia da Simon Fistill da La Ila, che manajëia na pizzeria dlungia Modena.
L’Emilia Romagna alda al momënt pro les provinzies plü atocades dal "coronavirus", cun passa 9.300 porsones positives y incër 1.000 morc (situaziun dl mercui). Ince iló é la vita chita daldöt. Tla fraziun de Casinalbo, a chi 7 km da Modena, abitëia Simon Fistill da La Ila, che manajëia deboriada cun süa fomena Elena Messori la pizzeria y restorant Piccadilly. Ara é oramai stlüta dai 8 de merz incá, l’ativité y le laur é chic. Chi che n’é indere nia zënza laur é i doturs y le personal di ospedai. Fistill cunta: "Incër nos ia pél veramënter la terza vera dl monn. L’ospedal é toch y plëgn, la jënt vëgn lasciada jö ti porti y i doturs laora n gröm d’ores al de. Al é desche an le vëiga tla televijiun."
Ince chësc l’á motivé da invié ia n’aziun de solidarité, che dess trasmëte altamo n rai de normalité. Dal’edema passada incá condüjel vigni de chës 30 pizzes tl ospedal de Baggiovara por i doturs y personal sanitar, sambëgn debann. Na aziun che dess jí inant cina ala fin dl’emergënza. "Chësc é nosc impëgn de solidarité che i aratun dërt da fá, ince por ti mostré nosta reconescënza al personal che mëss porté le pëis de chësta situaziun. I arati che vignun dess te so pice fá ci che al pó", injunta Simon.

Deplü podëise lí t’La Usc di Ladins di 27 de merz, olache Simon Fistill nes cunta co che al vir la situaziun "coronavirus" lajö y i fistidi por les ativités.  (pablo)