La Usc di Ladins

Sciöche te tan d’atri ciamps, á le "coronavirus" ince porté n scassarot tl monn dla scora, olache professuries, professurs, studëntes y studënc á da n de al ater messü se confronté cun scores stlütes y insciö ince cun l’insegnamënt a destanza. Bele l’ann passé de novëmber ân tla Val Badia stlüt por val’ dis les scores. Sëgn se tirera inant por edemes alalungia y da sciöche an á aldí, ne gnará l’ann de scora nia arlungé. Chësc ó dí che an messará por n iade s’imparé le material – ince chël por i ejams – da ciasa. I un porchël tut sö contat cun Nicol Burchia da Badia, studënta dla V classa ITE da La Ila, por damané co che ara s’á organisé tl stüde da ciasa, ci che ti büta y ci nia, y ci pinsiers che ara se fej por i ejams.

La Usc: Nicol, co é pa stada por te la mudaziun da fá scora a ciasa?
Nicol Burchia: I pröms dis l’âi n pü’ tuta sö sciöche na vacanza, sciöche sté n pér de dis a ciasa, por jí spo indó a scora. Mo canche al é gnü fora la noela che an messâ sté a ciasa tan dî, ái messü n pü’ recostruí ince a ciasa le vignidé che i â a scora. I á porvé da m’organisé ite n pér d’ores de stüde danmisdé y n pér domisdé. Al é dis che i feji n pü’ deplü, d’atri ch’i feji demanco. An mëss ciaré da adoré bun le tëmp che an é a ciasa, por rové do al program canche an jará indó a scora.

Döta la intervista ciafëise t’La Usc di 27 de merz  (pablo)