La Usc di Ladins

I artisć de vigni vers (atifs profescionalmënter tles beles erts, tla musiga, tla composiziun, tl teater y d’atri ciamps) é öna dles categories plü atocades dala crisa gaujada dal coronavirus por la vita da vigni de, la creativité, les iniziatives culturales y le spetacul. Y al n’é nia da odëi danfora canche les condiziuns da lauré por ëi pó indó gní metüdes en pratica. Cina iló proa un o l’ater da ester zacó atif, ajache creatif se stëntel da ester te chësta smorzia che ti dá püch fle y invenziun.

I ún baié cun Max Castlunger, che se proa por sté sura ega ia artisticamënter y ince materialmënter.

La Usc: Max, co vára pa sëgn che i podëis ince indó os artisć se möie?
Max Castlunger: "Poa, i podun se möie sciöche les porsones privates, mo i ne podun nia ciamó fá nosc laur desco denant. Les proes musicales cun d’atri musizisć n’é nia saurides da fá cun les restrinziuns dades dant. Le laur dl musizist y dl maester de musiga é tres ciamó scialdi limité. Cun i conzerc odarunse pa!"

I artisć, musizisć, jobleri profescionai, yii. é gnüs atocá a na manira posocia dales restriziuns por le coronaviurs. I sëis öna dles categories plü desfortunades te chësc momënt, ajache i ne podëis no soné dan al publich no dé leziuns de musiga?
"Por ci che reverda les manifestaziuns culturales, conzerc y teatri édl dessigü n tëmp dër ri, cun n gröm de ostacui che ne vá nia saurí da passé ia. Por ci che reverda les leziuns de musiga podunse le fá online o, cun les destanzes de segurté, ince privatamënter a ciasa. Te mi caje feji scialdi cursc de musiga por grups, y chël ne jará bëgn por plü di nia da fá."

Te nes as cunté al telefon che tö te sintes – adöm a tü colegs te Südtirol – fortuné, ajache la Provinzia á bele daidé y ves dëida finanziariamënter. De ci vers ves dëida pa la Provinzia?
"Sce an confrontëia nosta situaziun te Südtirol cun chëra de d’atri colegs tla Talia, spo mëssi dí che chiló se vára miú. L’Ufize ala cultura ladina (mo ince todëscia y taliana) se dá n pice contribut por naota 600,00 € por na opera realisada te chësc tëmp dl coronavirus, y lapró édl tres la poscibilité da damané n sostëgn por n proiet artistich plü gran da fá ia por l’ann. Chiló tómel ince ite spo le laur de preparaziun, de composiziun y spo sambëgn les spëises de realisaziun dl proiet. Dlungia chisc aiüc por la cultura oressi recordé a düc, che cun le plann "ipiunindoiaSüdtirol", édl ince la poscibilité sciöche profescionist lëde y picera impresa da damané i 'contribuc a de pices imprejes' che é n sostëgn bele n pü’ plü sostanzius (dai 3.000,00 ai 10.000,00 €). Les informaziuns y i criters por ciafé chësc contribut ciáfon sön la plata internet dla Provinzia de Balsan."

Liéde do deplü tla ediziun nöia de La Usc di Ladins dodoman!  (Iaco Rigo)