Al sará n pü’ n ater isté

Data

21 de mei 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tl Sorvisc ai Jogn Val Badia laoron a ritm plëgn por s’arjigné ca ai proiec da d’isté, che ne sará nia chi che an conesciô i atri agn. Mo l’alternativa é. I ti un damané deplü al coordinadú Valentin Erlacher
Por chësc isté â le Sorvisc ai Jogn Val Badia indó arjigné n bel program por nüsc jonins. Tla brosciüra "isté20" menada fora de merz êl preodü jites, iadi y edemes de aventöra, sciöche ince n gröm d’atres aziuns por che ince chësc isté lasciass zoruch de beles recordanzes. Cun le "coronavirus" é döt cant gnü trat sotissura: les limitaziuns y les mosöres de precauziun á ince metü le Sorvisc ai Jogn dan da "bindebó de laur implü y na gran desfida", por le dí cun les parores dl coordinadú Valentin Erlacher. Nos l’un contaté por damané ci che al nen sará de chësc isté, ci proiec che gnará fac, can che ai gnará fac y ci che an messará lascé ester.

La Usc: Valentin Erlacher, chël da iniann sará n pü’ n ater isté de proiec, no pa?
Valentin Erlacher: Damperfora oressi dí che ci che i fajun iniann á püch da nen fá cun i proiec che gnô pitá i ultimi agn. Iniann ne pón nia s’aspeté le "Isté Deboriada", le "Cool Summer" o le "My Summer" sciöche an le conesciô dai atri agn. Sce al ê zënza n program de devertimënt y aorela cörta, sarál iniann deplü n program de acompagnamënt di mituns, che é bele da mëisc a ciasa. Ci che i ciararun da tigní é sambëgn la cualité, cun personal cualifiché. Porimpó podunse impormëte che i fajarun dles dötes por podëi pité n program alternatif olache i mituns se stá saurí y en segurté.

Ci proiec pó pa le Sorvisc ai Jogn ciamó fá, cai pa nia?
Chiló messunse desfarenzié danter i grups dala 1. ala 4. elementara y i maius. Por l’Isté Deboriada êl pordërt preodü incuntades ti paisc, jites cun de döt y deplü. Ince pro le "Cool Summer" êl preodü edemes de aventöra, iadi al Garda o cinamai al’Isola d’Elba por i maius. Chësc toma en gran pert t’ega. Iniann jarunse demez da chëstes ativités y i jarun a pité n acompagnamënt di mituns, tla norma dles diretives. Chëres prevëiga che jites foradecá, spostamënc cun corieres y pulmins ne pó nia gní fates. I pici s’incuntará p.ej. te paisc y podará ma se sposté a pe, o cun le lift. Les edemes a tema ciararunse da adegué le plü che ara vá: p.ej. la "Action Week" ará ma plü ativités tla valada, les edemes de curs y workshop restará anfat, mo an messará partí sö i grups.

Co ciarera pa fora cun i grups y cun i orars? Tanc pó pa fá para, tan dî vá pa le program?
Por i mituns dala 1. ala 4. elementara ânse tl pröm preodü tl pröm preodü grups cina 24 mituns; sëgn pól nen ester 6 aladó de Balsan, 7 aladó de Roma. Por ci che reverda i orars, orunse ti jí adincuntra ai geniturs y i piarun ia bele dales 7:30 da doman, cun la poscibilité da condü alerch i mituns cina ales 8:00. Le program jará spo inant fina ales 13:00, cun tëmp da gní a se do i mituns cina ales 13:30. I mituns ciafará val’ dal danmisdé, mo nia la marëna, che é na chestiun bindebó zitia. I grups pó ma sté danter ëi y ne pó nia avëi contat cun d’atri grups o porsones esternes. Na novité é sigü che i piarun ia cun i proiec bele ai 15 de jügn, deache iló se röia le sorvisc d’emergënza tles scores y scolines, y i tignun cunt che püc jará al mer y sciöche dit indant - i mituns é bele mëisc a ciasa.Pro le "Cool summer" tomel fora cotan d’edemes. Chëres che i podun fá, respetan la norma, mantignará le medemo orar. Pro plü edemes gnarál fat de plü grups y chiló gnará i geniturs contatá i proscimi dis por ciafé adöm na soluziun. Praticamënter ne vëgn les iscriziuns de chësc proiet nia azerades, mo i laurun cun les iscriziuns che é gnüdes fates de merz. Al sará n’edema o l'atra nöia lapró. Pro chëstes, y sce al é ciamó posć lëdi pro d'atres, podarán se scrí ite l’edema che vëgn.

Döta la intervista ciafëise t’La Usc di Ladins di 22 de ma
 (Intervista: Pablo Palfrader)