La Usc di Ladins

Daite d’Al Plan, tla localité Fodara Masaronn, ciafon nia dalunc da strada öna dles beles morvëies dla natöra: les fontanes dl’Ega de San Ví. L’inom ciafa chëst’ega dal sant che la Dlijia recorda ai 15 de jügn, deache ara mët man da rogore de regola incër mez jügn. Nia insciö iniann, olache l’ega é bele spizorada n mëis denant, ai 17 de ma. Chësc é por mirit dles gran nëis gnüdes sö alalt bele de novëmber. L’Ega de San Ví pëia dala munt de Fanes, olache ara raita cina jö dal Lé Piciodel, se tira sot y vëgn indó a löm jö Pederü, "dal Cu" che an dij. Defata defora da Pederü se tirera indó sot tera ite, por se lascé odëi impormó val’ chilometer plü infora, tles fontanes a Fodara Masaronn. Le dr. Edi Pizzinini da Marin é tres sté n gran apascioné de chëst’ega y á scrit sö dal 1988 incá la data avisa de canche ara se lascia odëi. D’atres informaziuns ciafon plü inant tla Cronica dl Comun de Mareo. Ince sce ara é iniann gnüda valgamia adora, é le record gnü a s’l dé dl 2014, canche ara é gnüda fora bele ai 3 de ma. Dl 2008 él indere sozedü l’evënt plülere rér che l’ega é gnüda rodunt en San Ví. L’ega sará sëgn da odëi (y da bëre) cina incër jená, canche le let dl rü sará spo indó assöt.  (pablo)