La Usc di Ladins

Düc nes recordun la gran tempesta "Vaia" ala fin d’otober 2018, che á rosedé milesc y milesc de cubich de lignan. Le gran vënt n’á sconé gnanca i comuns dl’alta valada, olache al á scarzé sö bindebó de plaies tla contrada. Por comedé altamo en pert le dann y ti dé zoruch al bosch sü lëgns, él sëgn gnü metü en pe le proiet "WOWnature Alta Badia", promoiü da Alta Badia Brand y le comité dla Maratona dles Dolomites, en colaboraziun cun "Etifor" dla Université de Padova, che á metü en pé "WOWnature".
Le nojel dl proiet é la "adoziun" de lëgns. Sön i sic internet www.altabadia.org y www.maratona.it él düc chi che ó, che á la poscibilité da adoté n lëgn, don insciö n contribut por realisé chësc proiet ambiental. An pó chirí fora sce tó sö o ince scinché ia a zacai n peció o n lersc. I lëgns vëgn sentá sön n’areal de 12 hectars tl raiun de Ciaulunch y rodunt chësta jöbia ai 11 de jügn él preodü da senté i pröms 200 lëgns, en presënza de Lucio Brotto – responsabl de Etifor, y Michîl Costa – presidënt dla Maratona dles Dolomites. Döt cant sará da odëi dales 12:00 te na direta Facebook sön i profils dl’Alta Badia y dla Maratona dles Dolomites.
Por gauja dles restriziuns por le "coronavirus" vëgn i pröms lëgns sentá dai colaboradus dla dita WaldPlus, che á la zertificaziun de gestiun forestala "FSC – Forest Stewardship Council", en presënza ince di verdabosc; da d’altonn, canche al gnará senté i atri lëgns, orésson indere lascé senté i lëgns diretamënter da chi che i á "tuc sö". Cina en lönesc êl bele gnü cumpré passa 600 lëgns y ince ti mëisc che vëgn podarán ciamó nen cumpré, cina a rové ala zifra de 1.000, che ne podess ester degöna dificolté.  (pablo)