La Usc di Ladins

"Donauwellenreiter" é n cuartët nia da vigni de, y süa musiga trasmët la richëza y la diversité che an é ausá da aldí – ma chersciüda y svilupada inant, rogherüda sce ale dij tl lingaz dla ega. Tröp él sozedü da laota incá, dl 2012, canche al gnô fora chël pröm CD "Annäherung" dl grup che se tolô dant dal pröm momënt inant da descurí esperimënc sura i confins geografics y culturai fora, ciaré tan lunc y sot che musiga pó jí – raitan söles ones dl’ega y ince nodan cun y sot por sintí la dimenjiun "iadó le sonn". I "Donauwellenreiter" ti é tres stá fedei a so conzet inizial, sinziers cun sües capazités da podëi trasmëte musiga nia convenzionala.

Les usc dla critica tla stampa internazionala (austriaca, todëscia y südtiroleja) é a öna da laldé chësc CD nü "Delta" sciöche n früt garaté, che ti fej bun a döt le publich che á orëdles fines y n cör che ascuta. Albert Hosp de Ö1 dl ORF dij che le CD stá "por le lian conziliant danter ega che rogor y le mer davert", les dodesc composiziuns trasmët  n sonn de cuartet ciamó plü compat co denant. "in.Musik.de" scri: "I cater componënc variëia danter inozënza y teatralité, danter scemplizité y opulënza, danter eleganza lisiera y momënc classics; ai vá so tru da ambasciadus cosmopolitics te ciamps de ascutadus ambiziusc."

Maria Craffonara y l’interessant dla vocalisa

La Usc: Maria Craffonara, CD nöia cun composiziuns nöies. Sëise contënc artisticamënter y tecnicamënter dl früt y dl produt?
"Sce, chël sunse. Le laur a doré bun n ann y mez y é sté intensif. I ún ciaré da lauré fora dër avisa le material y ún ince indó sciuré demez val’ toch. Ci che an alda sëgn é tan co le conzentrat musical. Por ci che reverda l’aspet tecnich unse indó n iade podü colaboré cun na scuadra ideala, düc chi che á contribuí é corifees te so ciamp."

Liéde do deplü tla ediziun atuala de La Usc di Ladins (sön e-paper y tla ediziun stampada)  (Iaco Rigo)