La Usc di Ladins

Südtirol á da sëgn inant regoles nöies en cunt dles limitaziuns por l’espanjiun dl coronavirus. Al toma la destanza di 2 metri y i zëntri fitness, les saunes y les ativités sportives alaleria por mituns y jogn pó indó gní fates.

1 meter

La destanza de almanco 1 meter y zënza ma cun mascherot indos vel alaleria y daite por les porsones nia convivëntes. Ince por les porsones che fej sport alaleria él na novité: ares pó s'avijiné sëgn cina a 1 meter (ultimamënter êl scrit dant na destanza mëndra de 3 m). 

T’auto

Ince por i auti privac él sëgn val’ de nü: al ne mëss nia plü gní tigní ite la destanza de 1 meter danter passajiers nia familiars, mo te chisc caji tres cun le mascherot indos – ma sce i passajiers vir düc tla medema abitaziun ne mëssi nia avëi indos le mascherot.

Corieres y ferates

Por i autobusc publics y les ferates toma la capazité mëndra dl 60% y les destanzes danter un y l’atra. Mo al resta inant le dovëi de mascherot.

Teater y film

I jobleri y colaboradus de produziuns teatrales pó dé sö la destanza interpersonala de 1 m, sce al i vëgn mosoré vigni de la temperatöra y sce les mans vëgn dejinfetades. Pro proes de rezit y cianté mëssel gní adoré na visiera tan inant che la destanza de 1 m ne vëgn nia tignida ite.

Sport de scuadra

Chiló vélel inant les desposiziuns rigoroses a livel nazional.

Assistënza dl’enfanzia

Ince te chësc setur vélel la destanza de 1 m. Sot a 1 meter vál debojëgn de n mascherot chirurgich (al ne mëss nia plü ester n mascherot dla sort FFP2).  (Iaco Rigo)