La Usc di Ladins

En domënia él sté la gran festa d’Les Antlés, che an á iniann messü tigní cotan atramënter, por gauja dla situaziun "corona". Chësc án odü suradöt tl fat che an n’á nia podü fá la prozesciun eucaristica, che toca deboriada cun chëra dl Cör de Gejú pro les plü beles y ince sugestives dl ann: le ploan cun le santiscim sot le Cil, cor de dlijia y musiga che abelësc cun sonns y cianties da festa, confaruns, statues, bandires y tan d’ater. Döt chësc n’á iniann nia podü ester. Insciö án por le plü tigní la festa te dlijia.
Tla Ploania d’Al Plan é la mëssa gnüda zelebrada da pater Franz Senfter da Oies, abelida dal orghe de dlijia y n grup de stromënc. I fedei ê sambëgn düc cun mascherot y sentá jö sön i posć amarsciá. Regoles che valô ince por i Scizeri d’Al Plan, che n’á nia orü mancé ala festa. Ince ëi s’á metü sö amez dlijia jö y ê iló cun mascherot. Imajes che jará tla storia y che an se recordará.  (pablo)