La Usc di Ladins

Ester él val’ che sona dagnora bun, les bronsines y ciampaneles dles vaces sön pastöra. N bun sonn che rondenësc él ince vigni aisciöda tla Val dai Tamersc, olache i paurs de Mareo mëna sü tiers por val’ edema, denanche jí impara söles munts de Fanes, Senes, Fodara Vedla y Fojedöra. Iniann á i paurs condüt sü tiers tla Val ai 2 de jügn. I mëisc denant ê stá valgamia assöc, porchël n’ê la pastöra nia propi dër rica, tan che valgügn paurs á messü jí a ojoré sü tiers cun fëgn.
Les pastöres dla Val dai Tamersc é valgamia amples, y se sleria da Fodara Masaronn por passa 7 km cina ta Pederü. Tigní i tiers sot a control y ciaré che ai restes düc sagns intun é compit di famëis. Pröm famëi é sté iniann Karl Terrabona, che é gnü daidé dal jonn Manuel Ploner. "Al é veramënter da laldé le laur che ai fej ite por la Val", dij l’assessur ai paurs Patrick Complojer, "Al é na gran spersa y aladó él ince n gran laur da tigní i tiers sot a control. Dl ater vers, sce i famëis é bugn da se tigní i tiers, él sëgn che ai fej n super laur." Y de chësc vers éra garatada ince iniann, scebëgn che i famëis á albü na gran cumpëda de tiers da vardé. "Al n’é avisa 246", dij le famëi Karl Terrabona, ch’i un incunté ta Pederü, le de denant che i paurs jiss a munt.

Ci che i famëis nes á dit de so laur, y na impresciun dl jí a munt da Badia sö, podëise ciafé t’La Usc di Ladins di 3 de messé