Al Plan: La roa desdrüj strotöres
Les prömes fotografies dla gran roa gnüda jö le vëndres sëra a Al Plan
Al tona dötaorela alaleria (22:13h). Y le rî tëmp á fat bindebó de dann a Al Plan I un albü l’ocajiun da jí a tó sö les prömes impresciuns dla gran roa gnüda jö le vëndres söla sëra. Do plü granüjades, splaciades y temporai á le Rü dal Ermo y le Rü de Fojedöra a Al Plan mené jö de gran cuantités de material, paltan y pedruns cina tla localité Ciamaor, lascian zoruch n gran dann. La "spiaggetta" tan aprijada da ghesć y jënt dl post é slavatada y impaltanada, ince por gauja dl Rü d’Al Plan che gnô dër gran dala Val de Mareo fora, la "spiaggetta nöia" é ince en buna pert ingravada ite, cun banc y lëgns desgorc, y paltans indlunch. Le parch dla roda, che dê ester öna dles novités de chësc isté, n’á gnanca pordejü da gní rové che al é bele en gran pert slavaté demez, le senior park é impaltané ite. La gran roa é jüda ince sura strada comunala ia, desfajon les sis, deplü n’unse nia podü odëi. Olache al ê denant n gran let dl rü, él sëgn döt öna na spersa de paltans, pedruns y material. La strada por Pederü é stlüta al trafich, cina a data da definí. Söl post él rové bele domisdé i Stödafüs d’Al Plan, che é dötaorela söl post por vardé les eghes. Lapró él rové adalerch plü mascinns por fá i pröms laurs. (pablo)
Galaria retrac
- Banc impaltaná pro la "spiaggetta nöia".
- Al rogor bindebó de eghes.
- Le "bike park" é gnü en buna pert abiné dal material.
- Olache al ê denant bel vërt, él sëgn paltans y peres.
- Na odüda sön l’areal.
- Paltans indlunch.
- Le senior park incertlé da paltan.
- Na mësa pica sö, i banc é demez.
- Chiló passa la strada, pordërt.
- Mascins al laur söl post.
- Na impresciun de ci che resta.
- Al laur por tó demez n pü’ de material.
- Mascins al laur.
View the embedded image gallery online at:
https://www.lausc.it/valedes-ladines/val-badia/13060-al-plan-la-roa-desdruej-strotoeres#sigProIda929a6383f
https://www.lausc.it/valedes-ladines/val-badia/13060-al-plan-la-roa-desdruej-strotoeres#sigProIda929a6383f