La Usc di Ladins

I implanc portamunt tl’Alta Badia é da zirca n mëis en funziun: tres chisc se sparagnon n bel toch de iade dai paisc cina sö alalt, y an pó ince i adoré te val’ raiun sciöche na "metró" sura tera ia. N te’ ejëmpl ti öga ince ala jënt dal post nia tan bona da jí o che á mituns do ti pra danter Piz La Ila y Piz Sorega. Al é na novité de chësc isté che plej dër. Tres le coliamënt pón sëgn ince se sposté danter La Ila y San Ciascian, lascian l’auto te garasc.
La maiú pert di lifc romagn en funziun en chësc isté cina ai 27 de setëmber 2020, aldefora dla sentadoia Cherz 1 che stlujará ai 6 de setëmber, y Bec de Roces y les sentadoies La Fraina y Bamby che palsará spo ai 13 de setëmber 2020. Le plü di ará davert le lift de Gardenacia a La Ila: cina ai 4 d’otober 2020.
Ai ghesć ti vëgnel ince en chësc ann pité la Alta Badia Summer Card, la tessera che i pormët a adulc y mituns da adoré i lifc desvalis tl raiun turistich Alta Badia y dará n gröm de alisiraziuns: p.ej. smendrimënt dl’entrada al Museum Ladin de Tor y dl Ursus Ladinicus a San Ciascian, dl stadium dala dlacia a Corvara, dl biotop da Corvara y ince tl iade cun l’implant de Lagació.

N ofize a tëmp tla natöra

Te dui posć ti pra sura La Ila y San Ciascian él da ciafé en chësc isté la novité de postaziuns de "natural smart working", plü avisa sön Piz La Ila y sön Bioch. Te tëmps olache le "smart working" é atual, ne pó n ofize alaleria nia mancé, altamo ne ti ciáron nia tan fit al display, ajache la contrada de morvëia incëria fajará la gola y destolará n püch dala conzentraziun. Por lí na mail o scrí na resposta asvelta él a vigni manira na bona ocajiun! Les postaziuns de laur vëgn alimentades cun panei solars. Sön Piz La Ila y sön Piz Sorega él la poscibilité da lascé jö te n armé da na tle la tascia cun le tablet o PC.

 (Iaco Rigo)