La Usc di Ladins

Ann por ann án ite daite dai Tamersc da sćiampí cun les eghes. Canche le tëmp vëgn dër rî, spo él le rü che se slunfa y mëna gonot material cina tles pastöres. Iniann s’ân porchël ponsé da lascé ciavé fora dui lêc atira dan Punt Roa Furcia dai Fers. Le fin ê tler: lascé che l’ega impliss denant le pröm lêch y spo le secundo tosc dlungia, evitan che ara jiss inant fora por bosch y pastöra.
Intratan ê un de chisc lêc ince deventé post de relassamënt y aorela cörta, cun desënes de jogn che jô a sté a sorëdl y ince a fá le bagn. N plajëi implü, do che gran pert dla "spiaggetta" é gnüda ingravada ite. Ciamó en sabeda domisdé n’êl val’ desëna che á passé de beles ores. La ligrëza á indere doré püch. Tla nöt dal 1. ai 2 d’agost él gnü de gran splaciades y temporai ite por la Val. Les eghes é gnüdes tan granes che ares á ince desgort i dui lêc, de chi che al n’é plü resté tanco degun fostü. Lapró s’á les eghes ince tut n toch de tru dla roda y lascé raité jö na roa sön la strada de Fanes, che á messü gní romenada demez.  (pablo)