La Usc di Ladins

Le 2020 é n ann plëgn de novités por la Uniun Ladins Val Badia, nia ma deache al é da püch n presidënt nü a ce dl consëi nü metü sö d’invern. Da messé incá á la ULVB ince tut sö na secreteria a mez tëmp. Chësc post de laur che la Uniun á podü scrí fora chësc ann, giulan a contribuc provinziai, é dessigü na bona ocajiun por pité n post de laur tl ciamp dl lingaz y dla cultura ladina, daidan insciö da porté inant tröc proiec y alisiran ince le laur di volontars y dles volontares che fej pert dl consëi. Dal momënt che ara se trata de na novité por la ULVB y porchël ince de n profil profescional nü, á le consëi lauré fora i recuisic y i compic liá a chësc laur. Ara se trata de n laur dër flessibl cun compic desvalis, olache an sará tresfora a contat cun le lingaz y la cultura ladina, sciöche ince cun i atri dui lingac provinziai; al an ará sambëgn ince compic organisatifs y sará tröp a contat cun d’atres porsones, uniuns y istituziuns.
Do che le post é gnü scrit fora, él gnü metü a jí n concurs por chirí fora la porsona che foss deventada secreter o secreteria dla Uniun; da püch án ince l’inom dla porsona che á tut sö chësta inciaria: ara se trata de Marianna Kastlunger d’Al Plan.

T’La Usc di Ladins di 7 d’agost, tl Ciantun dla Uniun, ciafëise na intervista cun Marianna, che cunta de süa vita, süa motivaziun, sües idees.