La Usc di Ladins

An é tl laur da arjigné le Calënder Ladin 2021, che gnará fora de novëmber. Al sará la ediziun numera 60. Na pert importanta sará ince iniann chëra di retrac vedli, che nes mostra sciöche la vita, les usanzes, le vistimënt, i paisc ê n iade, porchël ési de gran valüta storica.
I inviun ince iniann les porsones da i mëte a desposiziun. Al pó ester retrac plü vedli, cina sö ai agn 80, che trata de nozes, families, uniuns, compagnies, laur, soldas, festes de paisc, festes de dlijia y tan d’ater. Pro i retrac vedli él sambëgn dagnora bel - tan inant che ara vá - da mëte pormez ann, inoms y cognoms dles porsones che é lassura. Chi che ess retrac vedli, pó tó sö contat anter la fin d’agost cun Pablo Palfrader al 0474 524042. I retrac pó gní condüc diretamënter te redaziun d’La Usc a San Martin de Tor, olache ai gnará digitalisá y spo sambëgn dá zoruch a so patrun.
Sce valgügn se fej plü saurí da i mené adalerch por mail, pói i ortié a pablo@lausc.it Ai dess ester te na buna cualité y cun na descriziun lapró. Bele danfora bel dilan.  (pablo)