Le test de na ispiraziun tradizionala sterscia dl Spiritual fej la roda dl monn, sura les cultures y religiuns fora, sura düc i lingac fora. Ciantada é la ciantia tl lingaz venda (dla familia di lingac bantu),
View the embedded image gallery online at:
https://www.lausc.it/valedes-ladines/val-badia/13357-jerusalema#sigProId9678c64bd7
https://www.lausc.it/valedes-ladines/val-badia/13357-jerusalema#sigProId9678c64bd7
Cina inier ne savô le monn nia de Nomcebo Zikode, la ciantarina cun chësta usc bassa y brilanta, y tl video ofizial al song tan bela da emozioné por l’Africa, por na oraziun, por n bal che aspeta speranza y de mius tëmps.
Bunamënter stá chësta Ierusalem ince desco cité imaginara che nes porta aiüt y sigurté te chisc tëmps nia saurisc dl coronaviurs, che nes condüj fora dala gran stlüta de ciasa y paisc, y nes pita na patria y liberté nöia.
Scebëgn che tröpa jënt fora por le monn bala zënza sëns respetus y spiritual chësta ciantia »Jerusalema«, réstera impó na oraziun, al podess ester n salm modern che chërda y prëia Di do aiüt. Y al é n Di che stá sura döt le monn y sura döta la jënt, credënta o ateista. La ciantia arjunj universalité y n liam y na gran unité zënza confins, fora de n test che püc capësc, nasciü te un di pic dl monn manco conesciüs y te na Africa massa gonot desmentiada, sfrutada y maladorada.
Chësta ciantia ti fej bun a düc por so ritm y söes usc, y ara vëgn balada y ciantada – te vigni verjiun – cun bona löna y amur por la vita y la creaziun. Ince ala religiun cristiana ti féjera bun, ara la scassa sö cun na oraziun nöia. Da speré él ma che la ciantia ne vëgnes nia strumentalisada, no da fanatics de religiuns o ideologies de vigni vers no dai ebraics che vëiga tla cité reala de Ierusalem söa patria esclusiva.
La verjiun originala dla ciantia »Jerusalema« é gnüda ciariada sön Youtube ai 12 de dezëmber 2019, ai 25 d’agost 2020 ára bele registré feter 98 miliuns de vijiuns. Por n test te n lingaz de mendranza n prestisc. Y düc i atri pici lingac, sciöche ince le ladin, rengraziëia!
Liam al video ofizial dla ciantia:
https://www.youtube.com/watch?v=fCZVL_8D048
(Iaco Rigo)