La Usc di Ladins

Danter les tröpes porsones che röia te nosta valada, n’él baldi ince valgünes che n’á nia les mius intenziuns. Pro chëstes toca ince na ëra abinada dai Carabiniers de Badia, che á arobé plü iadi te n hotel dla valada. Insciö éra stada en chësc de, canche n turist talian de 54 agn s’á ót ai Carabiniers, dijon che al ti ê sparí dala ciamena de hotel plü toc de belijia y scioldi en contanc: n bracialët d’or dal valur de 600,00€, n pér de rocini d’or cun brilanc Swarovski y la soma de 550,00€. Döt chësc zënza sëgns particolars.
Chësc ultim detail ti á recordé ai Carabiniers n’arobaria stada n pez denant, tl medemo hotel y cun les medemes modalités. Les inrescides é insciö piades ia y i sospec é tosc rová sön na ex colaboradëssa dla strotöra - na ëra romena de 48 agn.
Azertamënc plü menüs á porté a na percuisiziun tl’abitaziun dla ëra, olache al é ince gnü a löm la marcianzia arobada: i rocini Swarowski ê metüs fora bel en mostra, le bracialet y i scioldi án ciafé tosc dedó. L’intervënt asvelt di Carabiniers á insciö porté de bogn früc. La ëra é gnüda dada dant pro la Procura dla Republica de Balsan, deperpo che les cosses y i scioldi arobá é indó tles mans de so patrun.  (pablo)