La Usc di Ladins

Ester geniturs ó dí se tó sö la responsabilité da mantigní, istruí y eduché i mituns, tl respet de söes capazités, aspiraziuns y intlinaziuns. Al se trata de n dovëi y de n dërt, che le pere y la oma á dal momënt che al nasc le möt.
L’art. 30 dla Costituziun Taliana dá dant che i geniturs á le dërt y le dovëi da mantigní, istruí y eduché i mituns, ince sce chisc é nasciüs fora dl matrimone. Sce i geniturs n’é nia bogn da ciaré di mituns, él la lege che dá dant che che mëss se cruzié de ëi.
Cun la reforma dla familia dl 1975 él gnü porté ite le dërt y le dovëi de trami i geniturs da ciaré di mituns.