La Usc di Ladins

"Sanité – Südtirol Protects": chësc é l’inom dla dita nöia che á da püch daurí l’ativité y che s’á spezialisé sön la produziun de mascheroc chirurgics. La hala de produziun é tl raiun artejanal da Falzes, mo la sënta aministrativa é a Al Plan, olache al é ince chersciü sö so ideadú: Samuel Miano de 36 agn. Miano n’é nia nü a idees originales. Bele dan zacotan d’agn âl metü en pe deboriada cun Carlo Trebo la firma Adrenaline, che manajëia la Zipline a Al Plan y che costruësc intratan ziplines fora por le monn. Sëgn ál albü l’idea da mëte sö chësta dita nöia, na idea che ti é gnüda tratan le lockdown, "olache al ê pücia desponibilité de mascheroc y na cualité dër bassa di produc söl marcé", sciöche an pó lí te n comunicat. Miano á chësc mercui ai 26 d‘agost invié la stampa a na presentaziun tla sënta a Falzes, olache al é gnü splighé les carateristiches di mascheroc "Sanité", che é ponsá dantadöt por le setur clinich y che ó s’alzé fora por la cualité dl produt, la produziun tl Südtirol y n bun raport danter cualité y prisc. La produziun sön na mascin arjignada aposta é de chi 80 mascheroc al menüt, cun na capazité mascimala de 110 mile al de. Miano á ince cunté dla nasciüda de chësta firma, che pó cunté sön na linia de investidus – un di prinzipai é l’injenier y impresar Zeno Kastlunger d’Al Plan.

Deplü podarëise lí t’La Usc di Ladins di 4 de setëmber  (pablo)