La Usc di Ladins

Tl comun de Mareo él cater listes che se presentëia ai litadus: les listes de paisc »Al Plan«, »Paisc d’La Pli« y »Rina«, sciöche ince la lista surafrazionala »Düc Adöm«. Pro i candidac a ombolt él indere na sort de record. Sciöche pröm zitadin candidëia l’ombolt atual Albert Palfrader, sciöche ince Felix Ploner da La Pli de Mareo. Sce an stá indere ales listes dades jö, él ciamó 19 candidac lapró: chi dla lista »Düc Adöm«, che é düc portá ite sciöche candidac a ombolt y ince candidac por le Consëi. Ofizialmënter él porchël te Mareo 21 candidac a ombolt. Tanc nen ciafon te Südtirol ma tl comun de Lana.
Pro les lítes de Comun ciafará la jënt döes zetoles da lité: öna é por le Consëi, olache al é i simboi dles listes. Al é da fá na crusc sön le simbol y an pó da dé dant cina cater inoms de candidac, düc de chë lista. L’atra zetola é por la líta dl ombolt, olache al é ma na rissa por scrí ite l’inom y cognom dl candidat. Chësc sará te Mareo ciamó plü important, dal momënt che al é plü candidac a ombolt cun le medemo cognom.




 (pablo)