La Junta Provinziala á aprové n proiet por fá laurs al km 5 + 050 sön la strada dla Val Badia, olache al manacia tres indó da raité jö material. Investimënt de 730 mile euro
Tröc se recorda ciamó ci groaries che an â danter Mantëna Todëscia y Longega, canche al ê ciamó la strada vera. La situaziun é gnüda cotan damí do la realisaziun di cin’ toní. Indere él impó resté val’ pice toch che dá tres ciamó da sćiampí, sciöche dan le 2. tonel da gní itepert. Rodunt iló án iniann de messé messü saré la strada, deache material ê raité jö dal rogn y rové jö cina sön l’asfalt, do de maius plöies. Chi dl Sorvisc dles strades dla Provinzia mëss tres indó fá laurs por garantí che le trafich pois rogore sigü: drenajes, romené demez material, transënes de petun.
Sëgn á la Provinzia tut la dezijiun da fá de maius laurs che dess garantí plü segurëza. Tla sentada di 25
d’agost á la Junta aprové les carateristiches tecniches dl intervënt, por na spëisa de 731.300,00€. Pro l’intervënt él preodü da taié fora plantes y romené jö le material dal rogn, dedó gnarál metü sö rëis de proteziun stersces, che gnará ancorades y stabilisades cun cordes incrujades d’aciá 16 mm grosses. Le mür esistënt gnará alzé cun n mür de petun armé che gnará stabilisé cun ancoraziuns aposta y curí jö cun peres naturales. Nia inultima él preodü da renforzé i dui mürs »krainer« y inverdí danü döt le rogn.
»Chësta strada é la vëna de coliamënt prinzipala danter la Val Badia y Puster – dij l’assessur provinziaöl ala mobilité Daniel Alfreider – Cun chësc proiet gnarál aumenté la segurëza dla strada y la pert interessada dal intervënt«. Le diretur dla Repartiziun Infrastrotöres Valentino Pagani spliga che l’intervënt vá debojëgn: »La situaziun dl rogn vëgn monitorada bele da plü agn y de messé â le rî tëmp porté a na smöia cun material che é pié ia propi sön la pert dlungia le tonel, rovan ince sön strada«. Cun chësc intervënt speron da podëi avëi na pésc.
(pablo)
