La Usc di Ladins

Tla brosciüra sön i museums dl Südtirol nen vëgnel cumpedé sö al momënt 145, danter publics y privac. Ala numera 123 ciafon n museum che n’é forsc nia ciamó tan conesciü: al é le Museum Al Plan Dolomites, che i ostis Maurizio Trebo y Teodora Erlacher á arjigné ite tl Hotel Al Plan, ciasa che ai manajëia tla secunda generaziun. Chi che s’aspeta indere n salamënt plëgn de esponac, se fajará morvëia, deache te chësc caje se tratera de n hotel intier che é deventé museum. Rodunt por chësc adora i ostis la parora Hotel Museum, deache döta la ciasa é implida de toc particolars che jënt pó ester interessada da odëi.
Lëite ciafon veramënter patüc a 360 gradi. N gröm de morins dal café da zacan, tais y chicheres de porzelana, massaries da mesa y de ciasadafüch, ores vedles de vigni sort y mosöra, guant da zacan y da paur, cina a na capela intiera cun ogec sacrai. Chësc n’é indere nia döt, deache la pasciun de Maurizio é chëra por les döes y cater rodes, insciö ciafon na linia de auti oldtimer, na coleziun de vespes y motors vedli – döt adöm daimpró da 40 mesi. Y l’ultima invenziun: n fligher militar che pica da na falzada fora.

Deplü sön chësc museum, sön la idea che stá doía y sön co che al é gnü a s’l dé, podëise lí t’La Usc di Ladins di 9 de otober. Chiló ves pitunse n iade na cercia fotografica.  (pablo)