Conflic te familia o cun compagns, druch de prestaziun, malcontentëza cun se instësc, problems de dependënza, stres, desturbs alimentars, situaziuns de violënza. Aldedaincö él tröpes problematiches cun chëres che la jonëza y les families é confrontades, te na vita che é cun le tëmp gnüda tres plü busiënta. Problematiches che vëgn baldi gonot ciamó tignides tl ascognü, ci che ne porta sambëgn a degöna soluziun. Por ti jí adincuntra ales porsones che á da sćiampí cun chëstes y d’atres chestiuns, á le Sorvisc ai Jogn metü sö de ma dl 2019 le "Sorvisc de consulënza y orientamënt", istituí sön proposta dl Comun de Badia, por pité na sort de pröm aiüt sön temesc che reverda la jonëza y l’educaziun. Da dailó
incá él na consulënza dui iadi al mëis a Picolin y dui iadi al mëis tl Saj.un a La Ila, olache porsones pó s’oje debann por ciafé consëi tles situaziuns plü desvalies. Ezeziun án messü fá tl tëmp dl Covid, olache le sorvisc é tomé fora por rajuns de organisaziun. Sëgn él indere indó atif: an pó damané consulënza de porsona o ince tres whattsapp. Responsabla é Barbara Tolpeit da La Val, pedagoga soziala y colaboradëssa dl Sorvisc ai Jogn. Ëra nes á cunté dles dificoltés da pié ia, dles problematiches che vëgn tres ciamó massa ascognüdes ia y dl gran bojëgn da tigní bot inant.
T’La Usc di Ladins di 16 d’otober ciafëise na intervista cun la pedagoga soziala Barbara Tolpeit.
Chisc é i termins por le Sorvisc de consulënza y orientamënt:
Le sorvisc de consulënza por geniturs, jones y jogn, vëgn pité vigni 2. y 4. mercui dl mëis dales 9:30 ales 11:30 a Picolin, sciöche ince vigni 2. y 4. vëndres dl mëis dales 13:00 ales 15:00 tl SaJ.un a La Ila. An ne mëss nia s’anunzié, la consulënza é anonima y debann. Al vëgn ince pité la poscibilité da damané do tres telefon o scrí tres Whatsapp al numer 342 8410721.
(pablo)