La Usc di Ladins

"An dess cumpré emoziuns y nia cosses", dij n proverb. Tröc jogn "se cumpra" chëstes emoziuns fajon na esperiënza de plü mëisc foradecá, dalunc da ciasa. Insciö ince Timothy Davare da La Ila, che é sté cun so compagn Ivan Canins da Badia por 10 mëisc tla Zelanda Nöia. Timothy á 20 agn. Do les scores d’oblianza él jü a Sterzing a fá le Lizeum Scientifich cun orientamënt sportif. La maturité ál arjunt l’ann passé y do chësc travert orôl se tó na palsa por fá na esperiënza delá dal monn. Al é pié ia ai 21 de novëmber dl 2019, canche degügn ne baiâ ciamó de "coronavirus", y é rové zoruch iniann ala fin de setëmber. Te na intervista nes cunta Timothy co che al á vit la situaziun tla Zelanda Nöia, ci che al á fat laía, ci fac particolars che ti é sozedüs y la valüta che chësc iade á albü por ël.

La Usc: Timothy, ciodi este pa pié ia y ciodi pa avisa tla Zelanda Nöia?
I á rové dan da n ann la scora alta a Sterzing y spo ne savôi nia avisa ci fá. I n’ê nia tan motivé da studié inant y n’ess gnanca salpü avisa ci. Spo m’ái ponsé da me tó n ann por fá na esperiënza nöia foradecá. I sun rové a baié cun mi compagn Ivan Canins da Badia, che â ince imënt da jí. Al ê döes opziuns: Zelanda Nöia o Australia. Ala fin unse tut chësta dezijiun, dantadöt por la bela natöra.

T’as dit che i ëis cumpré n auto, s’ëis chirí n laur. Co ciarâ pa fora osta vita laía, üsc dis?
Nos s’un tres partí sö le iade danter rodé y lauré. I rodân n pér d’edemes, fajôn jites y se ciarân jö la natöra, jôn sambëgn ince ti locai. Spo êl indó edemes olache i lauran. I un scialdi lauré tl’ospitalité, tla gastronomia. Dan le Covid êl bëgn dër da cajin, dër tröp turism. Pornanche an á metü man da aldí les noeles dl virus s’ál spo archité ia, cina che an é rová tl lockdown.

Döta la intervista ciafëise t’La Usc di 30 d’otober.  (Intervista: Pablo Palfrader)