• T'es chilò:  
  • Home
  • Valedes
  • Val Badia
  • Südtirol: restriziuns nöies

Südtirol: restriziuns nöies

Data

02 de november 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Locai stlüc, didatica a destanza tles scores altes y universités, trasport publich limité y cotan d’ater. Tl Südtirol velel da en mercui inant cina ai 22 de novëmber mosöres plü strëntes por tigní sö les infeziuns da corona
Le presidënt dl Consëi di Ministri Conte s’arjigna da dé fora n decret nü cun restriziuns por tigní sö le slariamënt dl coronavirus. Decret che valará por döta la Talia. Ala pér é les regiuns gnüdes damanades da tó provedimënc lapró, aladó dla situaziun epidemiologica locala. Y sciöche an sá, é chësta tl Südtirol valgamia sterscia, cun n gran numer de infeziuns nöies vigni de. Chësc lönesc ai 2 de novëmber dales 17:00 á le presidënt dla Provinzia Arno Kompatscher y l’assessur ala Sanité Thomas Widmann tigní na conferënza stampa olache al é gnü presenté les restriziuns nöies che valará tl Südtirol, dal mercui ai 4 de novëmber ales 0:00h cina a döt le de 22 de novëmber.
Düc i provedimënc gnará spligá por menü tla ordinanza dl Presidënt dla Provinzia che gnará fora en mertesc ai 3, mo intratan él gnü splighé damperfora sü contignüs. Kompatscher á dit che prvedimënc nüs vá debojëgn, por sconé le sistem sanitar, Widmann á splighé che i pröms resultac odarán pormó te döes edemes, y á invié dassënn döta la jënt – ince chi che mët en dübe le virus – a n comportamënt responsabl.

Provedimënc nüs por Südtirol
Dlungia la oblianza generala da tó le mascherot canche an vá fora de ciasa y n’é nia susc o cun familiars, valarál da en mercui chëstes restriziuns:

- Proibiziun da jí fora dales 20:00 ales 5:00, adinfora de rajuns de laur, de sanité o caji ezezionai (sará avisa tla ordinanza; p.ej. cura de familiars);
- Bars restoranc, dlacinaries y pastizaries mëss stlü;
- Al vëgn conzedü le sorvisc da porté demez (take away) cina ales 20:00, mené fora spëisa apostada pón cina ales 22:00;
- Le comerz al detail mëss stlü adinfora de: apoteches, paraapoteches, trafic y botëghes cun marcianzia dl bojëgn da vignidé (la lista avisa sará tla ordinanza);
- De domënia mëss ince stlü les botëghes de alimentars
- I hotí ne pó nia plü avëi pernotamënc turistics, mo ma pernotamënc por rajuns de laur (lauranc). Chësc ó dí che nodadoies y wellness de hotel mëss gní stlüc
- Tles scores altes y universités velel cina ai 22 de novëmber la didatica a destanza al 100%, adinfora de caji ezezionai (sará avisa tla ordinanza, p.ej. porsones cun handicap o te situaziuns soziales particolares)
- Le trasport publich podará ma gní ocupé al 50%; al jará deplëgn, mo cun manco jënt lassura. Lapró pól ma gní adoré por rajuns de scora, laur o gran nezescité, NIA por tëmp lëde.
- Dötes les festes publiches o privates che porta a amudlamënc de jënt é proibides;
- Sport de scuadra, de contat y daite n’é nia conzedü; al resta la poscibilité da fá sport individual alaleria;
- Musighes y cors ne pó nia fá proa
- Les sentades dess gní fates tla forma de videoconferënza

Danter les mosöres aconsiades á Kompatscher invié da s’anuzé le plü che ara vá dl smartworking, ci che gnará mené do tl setur publich, mo l’invit vel ince por le setur privat.

Chi che oress se ciaré ciamó n iade la conferënza stampa sön Facebook, pó le fá sön chësc link: https://www.facebook.com/watch/live/?v=820801295350225&ref=notif&notif_id=1604333397330647&notif_t=live_video

 (pablo)

Galaria retrac

View the embedded image gallery online at:
https://www.lausc.it/valedes-ladines/val-badia/13890-suedtirol-restriziuns-noeies#sigProId6d23fb03db
Derevers su insom