La Usc di Ladins

Siur Tone Fiung n’á nia debojëgn de tröpes presentaziuns. Cun so laur a livel diozejan – dantadöt cun la jonëza y cun les families – ál albü l’ocajiun da incunté, baié, se dé jö cun n gröm de porsones. La pastorala de siur Tone é dagnora jüda dassënn a contat cun la jënt, suradöt ince jënt en dificolté; n aspet por chël che al é dassënn reconescënt. La domënia ai 18 d’otober á siur Tone podü festejé i 40 agn da prou te so paisc nadé La Pli. Bele la sabeda êl sté la benedisciun dl orghe ressané cun i öspi da festa, y spo da sëra iluminaziun dl paisc a onur dl iubilar. La festa é jüda inant la domënia cun ingres acompagné da cor, musiga y uniuns y spo sambëgn la mëssa te dlijia de Santa Maria dal Bun Consëi. Chësc iubileum é ince por nos stada na buna ocajiun por s’la cunté impara.

La Usc: Siur Tone, co ciarâ pa fora la Dlijia dl 1980, ch’i sëis gnü prou?
Al ê na Dlijia olache al ê ciamó tröpa forza, dër via. Al ê sigü na dlijia plü clericala, cun proi assá, scemia che nos studënc odôn bele che les vocaziuns y l’interes da studié teologia jô dër zoruch. I ân dër la minunga che i messasson ester bogn da fá na dlijia nöia, cun n spirit nü, formes nöies; na dlijia orientada do le messaje dal vagnele, cun la fede viüda tla vita da vignidé.

Sc’i ciarëis zoruch do 40 agn, odëise che chësc é garaté?
I á albü la gran fortüna che i vëschi – al n’é impó sté valch’ – m’á dagnora metü te chël post olache i á n pü’ mia sensibilité y ch’i me stá saurí. I á podü lauré te ci che m’é n pü’ dé: tla comunicaziun, cun ti sté dlungia ala jënt – gonot jënt che se sint stlüta fora – la daidé ciafé so tru, süa prospetiva.

S’esses pa ponsé che i fosses gnü un di proi plü conesciüs dla diozeja?
I ne sá nia sc’i sun chël. Mo i á albü la fortüna che mia forma de pastorala é dagnora jüda en contat cun i mass media. Da öna na pert m’á i media dagnora traté bun y ai m’á ince daidé porté inant idees. I arati spo ince che la jënt s’anadais bëgn ch’i ti ó bun.

Osc messaje é chël da acompagné, nia spraizé le dëit...
Mi spirit ê dagnora chël da nia porté dant na forma de moralism, mo ti orëi bun ala jënt. Le vagnele n’á nia le compit da porté inant la moral y manacé, mo al dá dagnora na prospetiva, anfat te ci situaziun che t’es. Chëra é la buna noela. Y a chël m’ái dagnora tigní: ti fá speranza ala jënt, ti sté dlungia y sambëgn ince incundé le vagnele, che á na forza sterscia.

Ne s’ál pa mai mancé da avëi na osta cöra?
Nou, na cöra n’ái nia albü mancia, ajache i á plü ion poscibilités davertes. I á dagnora orü jí plü inant y cun mi compit diozejan ái albü de gran prospetives de chësc vers. I á podü odëi la vita te tröpes cöres, mo ince ti sté dlungia a tröc proiec che vá sura les cöres fora. Sambëgn aprijëii dër le laur che vëgn fat tles cöres, deache la gran pastorala ne vëgn nia fata a livel de diozeja, mo tles cöres y sambëgn tles families.

Döta la intervista ciafëise t’La Usc di Ladins di 6 de novëmber, olache i ti un ince damané a siur Tone, sce al n’á mai albü mancia na süa familia.