"Tëra pa tö! – N aragn y na moscia s’arjigna al Nadé", insciö á inom la publicaziun nöia dla ULVB. La storia, scrita da Kai Pannen y traslatada tl ladin da Silvia Costabiei, é daldöt particolara, deache ara se trata de na storia–calënder d’Advënt partida sö te 24 capitui. Pro i dui protagonisć, Bisi y Cleto, se tratera de n aragn y na moscia che vir de vigni sort de aventöres fora por le tëmp d’Advënt. L’aragn Cleto apëia la moscia Bisi n bel de da doman y ó la lascé pingolé te tëra por se la mangé da Nadé. Bisi n’é sambëgn nia a öna y cun süa batola ti vál bëgn scialdi söi nerfs a Cleto. Tan dî che ai la tëgn fora adöm? Döt ne podunse nia ves cunté danfora!, mo sce i sëis coriusc, spo podëise aposté y cumpré le liber tres le QR-Code chiló dessot. Le liber ves vëgn spo mené a ciasa por posta. Dai 18.11 inant é le liber ince da ciafé tles botëghes de nüsc partners de venüda al prisc de 19,00 €. Nüsc partners é les botëghes “da Mario” a Corvara, “Malbo” a Pidrô, “Mascotte” a Al Plan (por aposté le liber dala Mascotte, scrí n sms por Whatsapp o telefoné al 0474 501293). Nos dla ULVB ves aodun a düc, pici y gragn, na bela letöra y n bel tëmp d’Advënt adöm cun Bisi y Cleto.
Chiló podëise ti ciaré a n pice video de presentaziun:
https://youtu.be/IJ8UgIiFDJA
"Tëra pa tö" - na storia particolara por ti jí adincuntra al Nadé
La Uniun Ladins Val Badia píta na publicaziun particolara por acompagné pici y gragn tratan l’Advënt
Galaria retrac
View the embedded image gallery online at:
https://www.lausc.it/valedes-ladines/val-badia/13980-tera-pa-toe-na-storia-particolara-por-ti-ji-adincuntra-al-nade#sigProIdf4c76156b5
https://www.lausc.it/valedes-ladines/val-badia/13980-tera-pa-toe-na-storia-particolara-por-ti-ji-adincuntra-al-nade#sigProIdf4c76156b5