La Usc di Ladins

Do les vacanzes da Gnissant á i scolars y les scolares de döt Südtirol indó podü pié ia y ince les scolines é gnüdes davertes. Mo por püch. Bele do n'edema él gnü tut la dezijiun da stlü sö döt. L'ona dles infeziuns é chersciüda dassënn y ara vá de bojëgn de mosöres plü strëntes por la arforé. Les leziuns te classa é insciö indô gnüdes sostituides dala didatica a destanza, sciöche al ê bele sté d'aisciöda. L'insegnamënt vëgn porté dant tres plataformes online y tecnologies che pormënt a scolars y scolares da tó pert ales leziuns a ciasa, dan le computer. Da pert de direturs y insegnanc vëgnel lauré dër tröp y metü n gran impëgn, mo al é da dí che la scora a destanza n'é nia le medemo. Ma da jí a scora, da sté deboriada te classa, da partí tëmp, momënc y esperiënzes cun i compagns pó i mituns y les mitans avëi n svilup uman y sozial. De chësta situaziun n'unse baié cun la direturia dla direziun raionala de Badia, la dot. Claudia Canins. L'intervista intiera podëise lí tl'ediziun di 20 de novëmber.  (kp)