La Usc di Ladins

www.comune.badia.bz.it o www.gemeinde.abtei.bz.it é les misciuns nöies dla plata internet dl comun de Badia, realisada en colaboraziun cun la dita austriaca Kufgen y le Consorz di Comuns. Ara se trata de na plata cun n design nü, plü saurida da lí respet ala verjiun da denant, che pormët n azes plü asvelt ales informaziuns. »Aladô dles normatives nazionales y europeiches sön l'azessibilité jôra de bojëgn de realisé na plata internet nöia« nes spliga Elia Adang, responsabl informatich dl comun de Badia. Al é insciö nasciü na plata internet nöia che se adatëia automaticamënter ala sort de aparat – computer, tablet o fonin – y ala dimensciun dl monitor. »Gran pert dla jënt deura sö la plata dl comun tres le smartphone o le tablet y la plata da denant ne se adatâ nia a düc i aparac«, dij inant Adang. Por scemplifiché la comunicaziun, él ince gnü ajorné l'aplicaziun »Gem2Go«, che pó gní desćiariada y che informëia i zitadins menan notifiches »push«.  (kp)