La Usc di Ladins

Le Sprar é n proiet metü a jí dal Minister dl Intern por tó sö y daidé i muciadus. Dl 2018 êl tres le »Decre­to Sicurezza« dl minister Salvini gnü mudé jö cun le proiet plü limitatif Siproimi (sistema di protezione per titolari di protezione internazionale e per minori stranieri non accompagnati, ndr). Tla comunité comprensoriala de Puster gnará le proiet Sprar stlüt jö anter la fin dl anny  al ne piará nia ia n proiet nü. »Ince sce la orenté dles porsones che se á dé jö cun le Sprar dal 2018 incá foss da jí inant, messunse zede por le momënt. Al é dër sciode, deache al é n proiet che dëida veramënter i muciadus da se integré«, nes dij l’assessuria al sozial dl comun de Mareo Elisabeth Frenner. Dla medema minunga é ince le promotur dl proiet, Hansi Rubatscher da La Val, che é dër contënt de sciöche le Sprar s’á desfiré, de sciöche al é gnü tut sö dai mucia­dus y ince dala comunité, se aodan da podëi pié ia indô n de cun n proiet nü: »La dezijiun da stlü jö le Sprar é gnüda tuta dala comunité comprensoriala dla Val de Puster, che ne sciafia nia plü dër da ti sté do, dantadöt dal punt de odüda burocratich. Positif él che, sön la cherta, é düc i comuns dla Val Badia –a pert Corvara – aüna da tó sö muciadus, porchël sperunse che ara garetes indô n bel de«, dij Rubatscher.
Por ci che reverda i muciadus che é sëgn ciamó a Longega y La Val, sarál i comuns che i daidará da ciafé na abitaziun, ái pö sëgn n laur y porchël la poscibilité da paié n afit.







 (kp)