La Usc di Ladins

N gröm de dites y lauranc da foradecá é chisc mëisc ince tla Val Badia por lauré sö les gran cuantités de lignan. Ai laora da na scurité al’atra y chësta sabeda ai 28 de novëmber él baldi gnü a s’l dé na burta desgrazia, sozedüda a Mantëna d’Al Plan, ti bosc sura Cianacëi sö. N laurant de na dita dal lignan é rové sot na gran raisc ite y á baldi pordü la vita. Do les prömes recostruziuns pél che le laurant ais taié ia cun la mascin dai lëgns la gran raisc, che al s’á spo ciafé ados. La dita á auti cun targa austriaca y pro le laurant se tratera de n ël bosniach de 51 agn. Deache al n’ê nia atira tler sce l’inzidënt ê te Mareo o sön terac da San Martin, él gnü alarmé impröma l’Aiüt Alpin da San Martin de Tor, por cherdé defata do ince chi de Mareo, i stödafüch da San Martin y Al Plan, la Crusc Blancia de Mareo y le joler Pelikan 3 cun le dotur d’emergënza, che á messü joré n pez denanche ciafé le post avisa tl bosch spës. I lauranc de bosch á daidé do lascian jí sö segnai de föm.
"Canche an vëgn alarmá por inzidënc te bosch, spo sán bele che an á forsc da s’arjigné a val’ de burt", dij Othmar Castlunger, surastant dl Aiüt Alpin da San Martin, che nes á cunté plü avisa co che l’intervënt é gnü desfiré. Canche i socoridus é rová sö, s’ái ciafé dant n scenar de lëgns rosedá, dër tl ërt y tl burt. Le corp dl laurant ê rové sot na gran raisc de deplü metri y n’ê gnanca atira da odëi. Insciö án cun l’aiüt di stödafüch impröma messü alzé sö la raisc y l’assiguré jö cun cordes por che ara ne rapresentass nia plü n prigo. Insciö éson rová pormez al laurant, olache le dotur d’emergënza á ma plü podü constaté la mort. I socoridus dl Aiüt Alpin á albü le compit da lascé jö la barela por incër 150 metri cina a rové pro la strada forestala, olache la salma é gnüda surantuta y condüta tla capela di morc d’Al Plan. En sorvisc é ince jüda l’Assistënza Spirituala, sciöche ince i Carabiniers, che á le compit da inrescí plü avisa la dinamica de chësc bur’ fat. Che l’ël pois palsé tla pésc de Dî.

Plü fortüna por Vallazza
Damí éra por fortüna jüda domisdé a La Val. Iló é l’Aiüt Alpin da La Val gnü cherdé da jí sura Biëi sö. Tratan le laur te bosch él sté l’assessur regional Manfred Vallazza che s’á ciafé ados na taia. Al á orü ester l’intervënt dl joler Pelikan 2, cun chël che al é gnü condüt tl ospedal da Bornech. I ti aodun ince tres La Usc na buna varijun.  (pablo)