La Usc di Ladins

Gonot canche an pënsa ala filosofia nes vëgnel en mënt n lingaz nia da intëne; al pê zënza significat y impede tlarí n problem, le fejel gní ciamó plü gran. An podess ponsé che madër porsones cun tröp tëmp lëde pois se dediché a chësta materia y a sü problems.
D’atra pert podesson ince dí che degügn ne pó sciampé dala filosofia, deache ince ma bele porvé da argomenté ciodí che an ne messass nia la studié y la adoré, é bele na chestiun filosofica. Düc nos fajun filosofia tla vita da vigni de, mo nia düc n'é cosciënc de chësc.
Aristotele, un di plü importanc filosofs dl’antichité, á scrit che “la filosofia nasc canche la porsona á desgropé sü problems primars”. En chësc caje podesson dí che la filosofia n’á nia na relevanza primara por nosta esistënza. Mo sce i ti ciarun plü avisa a ci che foss veramënter “primar” por nosta vita, spo messasson madër se conzentré sön i debojëgns fisiologics. Te chësc caje ne podesson gnanca baié de n “vire” mo de n “suravire”. Al contrar é nosta vita por la maiú pert fata de ativités nia fisiologiches: nos se dun jö cun le sport, i stun cun i amisc, i sogun, amun, periun, liun, rodun y i se fajun domandes. Chëstes ativités é chëres che nes dá sodesfaziuns y che fej la desfarënzia danter nos y i tiers. Tres Aristotele, te süa opera Politica, scri che “la porsona é n tier razional”. Da canche les porsones esist, se féjera domandes sura l’esistënza, le monn, la vita y sü significac. Porchël podesson dí che fá filosofia ó dí se realisé sciöche porsones.
Zënza la filosofia, che nes dëida da ti ciaré plü avisa ales chestiuns, delá dales aparënzes, n’esson nia arjunt tröpes descurides y tröc resultac te nosta storia, sciöche la revoluziun scientifica, l’iluminism o la democrazia instëssa.
Aldedaincö podunse ciafé la filosofia te deplü ciamps dl savëi, sciöche les sciënzes, le dërt, i lingac, l’ert, la religiun, la politica, la storia y insciö inant. Porchël nes dëida le stüde dla filosofia da capí trö' damí düc chisc seturs dla archirida y dla sozieté y fej pert de vigni percurs lizeal.
Por stlüj jö pón zité ciamó na frasa de n filosof franzesc important dl ’700, Voltaire: “Al n’é nia bel da avëi dübi, mo vire sënza é ridicul. Madër i tec é sigüsc de ci che ai dij”. (ll dubbio non è piacevole, ma la certezza è ridicola. Solo gli imbecilli son sicuri di ciò che dicono, ndr).

Tla ediziun stampada di 29 de jená ciafëise n valgügn pinsiers dles studëntes dla terza y cuinta classa dl Lizeum sön le stüde dla filosofia y d'atri articui y stories scric dai studënc y dales studëntes dles Scores Altes da La Ila.   (kp)