La Usc di Ladins

Co ón pa ince trá adöm n ann turistich che jará zënzater tla storia? Le "coronavirus" á lascé na merscia sota tl pilaster economich plü important dla Val Badia, y á ince stramudé l’argomënt de discusciun. I ultims agn baiân ciamó de overtourism, dla esageraziun dl turism de cuantité. Le coronavirus nes á indere porté döt le contrar: paisc öc, alberc stlüc, jënt zënza laur y n chît che fej bel plan me ales orëdles, dlungia le me al tacuin. La soluziun stá sciöche tan gonot amesa ite, tla dërta mosöra.
L’ann turistich 2020 (y sigü ince le 2021) jará zënzater tla storia de nosta valada, sperun sciöche ezeziuns. La mosöra dles pordüdes se lascia ince ma intant splighé cun les zifres dles Assoziaziuns Turistiches. Mo chi é i dac al momënt plü concrec che i un danman. Les zifres assolutes fej süa parüda y impresciun: tla Val Badia él rové adalerch feter 200 mile sciori demanco, che é stá suranöt chi 800 mile iadi demanco. En porcënt: les gnüdes cara dl 30,82%, les sojornanzes dl 25,96%. Jü zoruch é le marcé prinzipal di taliagn, mo sintí án dandadöt ince la mancianza di todësc, che vá zoruch de n terzo.

T’La Usc di Ladins di 29 de jená podëise lí deplü sön l’andamënt turistich, comun por comun, olache al é particolarités y ince coriosités  (pablo)