La Usc di Ladins

Te na valada tan en bëgnester sciöche la Val Badia stënton forsc deplü da s’imaginé che families podess ince adoré sostëgn por cumpré patüc da mangé. Y te na valada tan en bëgnester él ince plü saurí da capí che jënt se stënta deplü da dí che ara adorass aiüt. An sá indere che la falzada é öna na cossa, la realté n’atra. Ince tla richëza de Südtirol él jënt che á debojëgn, che stënta da rové ala fin dl mëis o che é ligra sce ara ciafa n aiüt.
Tl comun de Badia án dé öna na resposta de chësc vers, meton sö la »Bancarela dl mangé«, olache jënt pó jí edema por edema a se do patüc da mangé cun la scadënza dër daimpró, mo a vigni moda ciamó bun. La »Bancarela« é piada ia ai 15 de jügn dl 2017 y á cun le tëmp ciafé tres plü aprijamënt. La sënta é te n local dla Ciasa di Pici basite a San Linert, y ara é daverta vigni jöbia dales 9:30 ales 10:30. Le sorvisc vëgn desfiré da n grup de 8 volontars, coordiné da Igi Dapunt de Badia, deboriada cun Antjesusann Ca­stlunger da La Ila. A Igi ti unse damané tan che le sorvisc vëgn adoré, sce al vëgn metü a desposiziun patüc assá y sce le bojëgn é gnü maiú tl tëmp dl Covid.

Igi, co vëgn pa tuta sö la Bancarela dl mangé?
Dal mëteman ê la jënt n pü’ scetica y ne s’infidâ nia dër da gní pormez. Al ê cuaji sciöche ara se dodass. Cun le tëmp s’ára svilupé dër bun; i un vigni edema chës 15 – 16 families che vëgn a se tó patüc da mangé, y al me sá dër bel da odëi che ares á ciafé crëta y ne se doda nia plü da gní Al é tla maiú pert families dl post, demanco les families de extraco­munitars. Y suradöt él families de Badia, forsc ince deache por i atri dui paisc él plü a desman. Ultima­mënter ái osservé che al é tres deplü ince families jones, olache an conësc ince che ares adora; por nos él dër na bela cossa sce le patüc röia olache al é le bojëgn.

Döta la intervista ciafëise t’La Usc di Ladins di 5 de forá

!!!La foto é gnüda fata ti tëmps dan le coronavirus!!!  (Intervista: Pablo Palfrader)