La Usc di Ladins

Co s’á pa mudé le marcé di auti cun la pandemia dl Covid–19? Se vega pa la jënt ciamó l’auto nü? Tan inant á pa le clima da dí canche na porsona cumpra n auto? Chir pa nosta jënt l’auto eletrich y él pa ince d’atres alternatives? Chëstes y d’atres domandes ti unse fat a Gustav Mangutsch de Badia, che laora tla dita de familia Auto Alta Badia. Ël nes á ince cunté co che le laur s’á mudé, ci auti che vá le plü y ci azessurs che ne pó nia plü mancé.

Gustav, i s’avijinun oramai a n ann intier che i viun cun la situaziun dl coronavirus. Ci efet ára pa albü sön le marcé dl auto y sön osta realté en particolar?
Gustav Mangutsch l é döes realtés da confronté. Dal mëteman, canche döt le cajin é pié ia, s’á le marcé en general atira archité ia. Döt ê chit y degügn ne podô lauré. Chiló da nos ne l’unse nia sintí atira. Al é impó sté tröc che s’á vaghé l’auto y é jüs inant normalmënter. La situaziun cambia n pü’ sëgn, sides chiló da nos che te Südtirol en general. Al mancia l’invern y an vëiga che la jënt sparagna trö’ deplü. Chësc ne reverda nia ma le marcé di auti, mo an le sint n pü’ indlunch.

Canche düc messâ sté te ciasa, él tler che degügn ne jô a cumpré auti. Dl ater vers é le sorvisc da mecanich jü inant normal?
Chël é jü inant normal, deache al tomâ ite ti sorvisc de emergënza. Por les venüdes unse indere ciaré da se sposté sön l’online, sciöche tröc á fat. Öna dles püces cosses che la pandemia á fat bun, é la digitalisaziun. Tröpes imprejes s’á digitalisé, ince porsones che n’ess denant mai ponsé da lauré tan tröp söl digital.

Sëgn junse inant n pü’ da n lockdown al ater, can plü can manco sterch. Ci che é resté é les mosöres de precauziun: destanzes, mascherot, etc. Co á pa les restriziuns mudé osc sistem de laur?
Canche al ê i gragn lockdowns, che an ne podô gnanca jí fora de comun, ne podô la jënt nia gní alerch. Sambëgn él n gran problem sce te mëss spëne n bel scioldo da cumpré n auto y ne pos nia gní a l’odëi. Danter fotos y mené videos porvân mefo cun chël. Sëgn che la jënt pó se sposté deplü, tolon sambëgn le mascherot, an tëgn les destanzes y ince da porvé fora l’auto ciaron da fá i iadi plü cörc che ara vá.

Döta la intervista podëise lí t’La Usc di Ladins di 5 de forá



 (Intervista: Pablo Palfrader)