Imparé la Storia, por ne desmentié nia

Data

26 de fauré 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Studié ci che é sozedü é dër important por capí le monn d'aldedaincö. N valgönes reflesciuns dles studëntes dl Lizeum sön le "De dla Memoria"

Danter les materies tratades te scora á le program de storia n post de gran valüta, por deplü rajuns. La storia ne é nia ma na archirida de fontanes, na analisa de fac, na cumpëda de dates y personaji. Ara ne é gnanca ma na interpretaziun dl passé. Ara é dantadöt conescënza de ci che é sozedü inier, por capí damí ci che é incö, ci che i sun – o dit damí – che che i sun. Te chësc caje devënta la storia valch de ví, na arpejun y n insegnamënt: ara devënta Memoria. Ci che despartësc ciamó massa gonot i popui é n'ester nia bugn da partí la memoria, s'incunté tl'interpretaziun y tigní fora les conseguënzes dla storia. La scora á porchël na gran responsabilité de chësc vers: chëra da ti pité ai jogn i stromënc de archirida storica y da ti insigné la onesté inteletuala, la dërta interpretaziun di fac che é sozedüs tl passé. I ne podun nia fá demanco dl passé sce i orun capí le presënt, se daurí ai atri y tó sö zënza preiudizi i cambiamënc che la sozieté se tol impara. La storia nes insëgna le confrunt, la responsabilité, la democrazia y la liberté.
Ala fin dl mëis de jená (ai 27.01) y al scomenciamënt de forá (ai 10.02) él gnü metü sön le caldënder dui dis che á n significat particolar dal punt de odüda storich: le »De dla Memoria« y le »De dl Recort«. Chisc dui dis ó tigní ví le recort dles vitimes de regims totalitars, dl nazism tl pröm caje y dl comunism tl secundo. I studënc dles Scores Altes da La Ila se á dé jö cun chisc fac storics tres letöres, films, cianties y articui de foliec. Ai é gnüs inviá da ponsé al passé, mo ince a ci che an li, vëiga y alda aldedaincö en cunt de intoleranza, descriminaziun y preiudizi.

N valgönes scolares á partí sües conscideraziuns, che i ún publiché tla ediziun stampada d'La Usc che vëgn fora incö, vëndres ai 26 de forá.  

 
 (kp)