La Usc di Ladins

Che le iubileum de n schiclub toma ite avisa cun na gara de Copa dl Monn é bëgn na rarité. Rodunt chësc él indere sozedü iniann a Al Plan, olache al é sté ai 26 de jená la Copa dl Monn dles ëres, y le medemo de le iubileum dla fondaziun dl Sciclub, che é söl papier portadú de chësc evënt (materialmënter él Al Plan Events che fistidiëia). Sciöche Lois Ellecosta scrí tl liber "I schi te Mareo", gnü fora dl 2016, êl bele sté ai 13 de jená dl 1946 incër 20 porsones che s’â abiné tla ostaria dal Ostí d’Al Plan por mëte sö le "Sci Club S. Vigilio di Marebbe – Dolomiti" o le "Sciclub Al Plan", mo al scrí ince che "Generalmonter vëgnel dit che la pröma sontada é stada ai 26 de jené dal 1946 y ch’al n’ea nia roé adalerch plü co 6 o 7 porsones". A vigni moda: le Sciclub d’Al Plan ê le 9 dla provinzia de Balsan y le nra. 44 dla Talia. Ciamó en chël ann, ai 27 de novëmber dl 1946, é le Sciclub gnü registré ofizialmënter pla FISI taliana, sciöche terzo dla provinzia de Balsan, do chël da Sterzing y da Nöia Ladina.

Da chël ann él rogorü "en gröm d’ega sot le Punt da Valiares", desche chi d’Al Plan dij, y le Sciclub é passé danter desfides, alc y basc, sciöche ara é te vigni uniun. Dal Sciclub d’Al Plan él ince nasciü cotan de atlec che á fat dl sport süa profesciun y pasciun de vita: i ejëmpli plü frësć é Alexander Ploner y i fredesc Manfred y Manuela Mölgg, o ince le dagní che impormët bun, danter l’ater cun le jonn Tobias Kastlunger. Nos se l’un cuntada cun le presidënt Gabriel Palfrader, por damané co che an laora incö, co che l’interes é y ci che n schiclub dess trasmëte aldedaincö.

La intervista cun le presidënt ciafëise t’La Usc di Ladins di 26 de forá  (pablo)