La Usc di Ladins

La chestiun dla nodadoia tl Comun de Badia é na taialungia che vá inant da plü di. Bele dan trëi agn â Manfred Canins fat na inrescida por odëi sce l'Alta Badia ess albü debojëgn de na nodadoia publica. Te süa analisa âl conscideré dantadöt l'aspet economich y finanziar y da so stüde êl gnü fora che le 50% di operadus turistics ne se damana nia na nodadoia publica. Dan da n valgügn dis é chësc tema indô gnü trat ca. La lista »Manfred Canins Ombolt« á publiché ai 22 de forá sön süa plata Facebook n post te chël che ai scri chësc: »Degöna nodadoia tl zënter scolastich a La Ila! Tl Consëi Comunal di 10.12.20 él gnü aprové la convenziun cun la Provinzia por la costruziun dl nü zënter scolastich y scora de müjiga a La Ila. Le proiet odô dant ince la costruziun de na nodadoia nöia interna. Püc dis dedô á la Giunta Comunala incariché l’architët da tó demez la nodadoia dal proiet dles scores. Chësta dezijiun é gnüda tuta dô nosc spiné y dô chël dla direturia y di insegnënc dla scora alta. (…)« Inant, tl post, á l'oposiziun sotrissé sciöche la nodadoia publica sides de gran importanza por ti dé ai mituns la poscibilité da imparé da nodé, mo che realisé y mantigní na nodadoida publica ne sides, da d'ëi infora, nia fatibl. »Nos sun tres stá decuntra a na nodadoia destacada dal zënter scolastich, deache le Comun n'é nia bun da la mantigní, mo dal'atra pert sunse por na nodadoia tl zënter scolastich che garantësces a nüsc mituns la poscibilité da imparé da nodé.« Insciö se stlüj jö le post.
Bele tla sentada dl Consëi de Comun di 10 de dezëmber êl gnü baié tröp dla nodadoia, ince sc’al n’ê nia chël le punt al ordin dl de sön chël che le Consëi messâ tó na dezijiun. Inlaota êl da aprové la proposta de convenziun cun la Provinzia de Balsan. Amez forá 2021 á i esperc inciariá dal Comun – la pedagogista y professuria universitara Beate Weyland y l’architët Luca Canali – dé jö le stüde pedagogich che jô debojëgn, denanco scrí fora i laurs da proieté. Chësc stüde é gnü arjigné ca te passa n ann de laur, tignon cunt dles esigënzes nöies y atuales da insigné y tolon porchël ite les idees di direturs, di insegnanc, geniturs di mituns che vá a scora y de deplü aconsiadus de Comun. Le fin ê chël da cherié n stromënt por capí coche les trëi scores dess comuniché, ciünes lercs che pó gní anuzades deboriada, co ch’an pó sfruté les sinergies. Tl stüde ne vëgnel ignó baié dla nodadoia, mo ma de coche le Zënter scolastich dess gní proieté, tignon cunt dles esigënzes pedagogiches dles trëi scores.
Dal momënt che l’argomënt é gnü trat ca dal’oposiziun tl Consëi de Comun, unse orü damané l’ombolt Iaco Frenademetz ci ch’al nen sará dla nodadoia tl Comun de Badia. 

Süa resposta podëise lì tla ediziun stampada d'La Usc di Ladins che gnará fora en vëndres ai 5 de  merz. 



 (kp)