La Usc di Ladins

Sëgn unse la notizia ofiziala: i lifc ne piará nia plü ia. I ún aspeté, i ún sburlé y i ún speré che ara jiss da scomencé. Mo tlafinada n'éra nia garatada. I ún viü n invern dër particolar. Rich de nëi, mo pür de sciori. Al é sté por düc n gran cambiamënt y propi de cambiamënc scri l'ostí da Corvara, Michil Costa, sön süa plata Facebook: »Datrai fossel plü saurí da mëte le ce sot le saurun, co da afronté n cambiamënt. Eh, bunamënter fossel plü comot, mo al ne paiass nia la möia.« I sun piá ia da chësc pinsier y i ti ún fat na intervista, te chëra che i ún baié de proiec, de ospitalité, dl turim che é sté y de chël che sará, tl tëmp do la pandemia.

La Usc: Sön Facebook ëise scrit na frasa che fej ponsé sura. I scriëis de cambiamënc y dla dificolté dai afronté. Cai é pa stá por os – en particolar sciöche ostí –  i maius mudamënc da canche al é le coronavirus?
Michil Costa: Iö sun dër cambié da canche al é le virus, i sun gnü plü cosciënt dl'importanza da mëte da jí n'economia sostenibla y i á capí che da porsona sensibla – sciöche i arati de ester, almanco por ci che reverda certes tematiches – sunsi deventé ciamó plü sensibl. Y, sciöche iö sun cambié, arati che ince d'atri mudará: les bunes porsones gnará ciamó mius, les stletes porsones gnará indere da peso, plü radicales y agressives. Chësta é da me infora la tendënza.
Iö ne arati nia da ester na buna porsona, mo n bun ostí, chël bëgn. I me dá da fá por mëte da jí proiec che garantësces le bëgnsté de tröpes porsones y chisc proiec me dëida dër da relativisé les cosses. I ne diji nia che le virus ne sides nia n problem, mo al n'é dessigü nia le maiú. La situaziun dles ëres afghanes y le mudamënt climatich é da me infora problems plü gragn co la pandemia. 


Döta l'intervista podëise lí indoman, vëndres ai 5 de merz, tla ediziun stampada de nosc foliet. 






 (kp)